Shillong, Nailar 13
U Roberto Mancini u la iehnoh ïa ka kam kum u head coach jong ka kynhun ïalehkai phutbol ka Italy, la pyntip ka Football Federation (FIGC) jong kane ka Ri ha ka sngi U Blei.
Lah ban pynkynmaw ba u Mancini u la shimti ïa kane ka kam ban btin lynti ïa ka Italy ha u snem 2018 hadien ba kam shym la lah ban ïoh rung sha ka lympung World Cup.
Wat la kum ka Ri, ka Italy kam shym la ïoh rung sha ka lympung World Cup hynrei na ka liang u Mancini u la lah ban ïalam sha ka jingjop ha ka lympung European Championship ha u snem 2021 hynrei hadien kane, kum ka kynhun ka la hap ban mad biang ka jingsngewsih hadien ba kam shym la lah ban rung biang sha ka lympung World Cup ha u snem ba la lah, ba la long ha Qatar.
Ha u bnai Jylliew, ka Italy ka la khur ïa ka kyrdan kaba lai ne ka ‘third place’ ha ka lympung Nations League hapoh ka jingpeit jong u Mancini.
“Ka bynta kaba khraw ha ka history jong ka Italy, kaba la sdang ha u Jymmang 2018, ka la poi noh sha kaba kut ha u snem 2023 ha ka Nations League Finals,” ong ka kyrwoh na ka FIGC.
Na ka liang jong ka FIGC ka la pyntip ba na ka bynta ki lympung kiba heh ki ban sa long, kum ka jingïaknieh rung sha ka lympung UEFA Euro 2024, kan sa pynbna ïa ka kyrteng jong u Coach ba thymmai ka Ri ha kine ki khyndiat sngi ban wan.
