Khliehriat, Nailar 13
Ka Diengshynrum Sports Club bad ka Sutnga Mission Sports Club ki la khur ïa ka jingjop ha ka jingïalehkai jong ka lympung Second Division Football Tournament ba la pynïaid da ka East Jaiñtia Hills District Football Association (EJHDFA) kaba long ha artificial turf ha Diengshynrum.
Haba phai sha ka jingïalehkai kaba nyngkong, ka Diengshynrum Sports Club ka la lah ban pynliem noh da 4-0 kol ïa ka Kairang Sports Club. Ïa kine ki kol jong ka Diengshynrum la thep da u Khreh Lyngdoh ha ka minit kaba 14, u Rumi Lyngdoh ha ka minit kaba 23 bad 32 bad u Enric Sympli ha ka minit ba 76.
Ha ka jingïalehkai kaba bud hapdeng jong ka Iongkaluh SCSC bad ka Iongkaluh Wahsder Sports Club ka la long kaba itynnad bad ïakhaid bha bad watla baroh ar liang ki la ïakhun tyngeh ban khyrwit kol hynrei haduh ba kut kim shym la lah bad ban ïahun noh da kaba shu ïasam point.
Haba phai pat sha ka jingïakhun kaba khatduh jong kane ka sngi, ka Sutnga Mission Sports Club ka la lah ban pynliem noh ïa ka Umlyngsha Youth SSC da 1-0 kol. Ïa kane ka kol jong ka Sutnga Mission la thep da u Greatstar Pajuh ha ka minit ba 56.
