Beirut, Nailar:
Ki bor pyniaid ka Syria ha ka Sngi Thohdieng, ki la iathuh ba 23 ngut ki shipai ka Syria ki la duh noh ia ka jingim hadien ba dkhot ka kynhun lehnoh Islamic State (IS) ki la leit pynbthei bom ia ka bos ba shong ki bor pahara jong katei ka ri ha katei ka jingjia.
La ong ba ki dkhot jong katei ka kynhun lehnoh IS, ki la ap khnang ban ioh thombor ia katei ka bos ba shong ki bor pahara jong ka Syria ha ka por ba ki don hapoh ka thaiñ Deir Ezzor ha ka Sngi Palei.
Katei ka jing pynbthei bom jong katei ka kynhun lehnoh, ka la shim ia ka jingim jong 23 ngut ki bor pahara kiba don hapoh jong katei ka bos ha katei ka sngi. Katba 10 ngut pat ki la shu mynsaw bad don pat katto katne napdeng jong kitei kiba lait-im, kiba la mynsaw jur.
La ong ba watla katei ka kynhun lehnoh ka la duh noh ia katto katne ki bynta ba ka ju kam trai bad shong ha Syria naduh u snem 2019, hynrei wat haduh kine ki sngi, katei ka kynhun ka dang iai pynjur ia ki kam pyntriem jongka na ka por- sha ka por khamtam ha ki bynta ri shyiap jong ka Syria ba katei ka kynhun ka ju leh ia ki kam thombor bad phet krad noh tang mar ia dep thombor.
Ki dkhot jong katei ka kynhun, dang ha kine ki khyndiat taiew ba la leit, ki dang leit thombor ha kiba bun ki bynta jong ka thaiñ North bad Norteast hapoh Syria.
