Shillong, Nailar 13
Ki ar tylli ki kol kiba la ïoh ban khyrwit da u Cristiano Ronaldo ki la ïarap ïa ka Al-Nassr ba kan ïoh rah ïa ka nam lahduh kaba nyngkong eh jong ka lympung Arab Club Champions Cup.
Une u rangïalehkai shakhmat ka Portugal ba la 38 snem ka rta, u la lah ban don ka bynta ba khraw na ka bynta ka Al-Nassr kaba la wan nadien ban lah pynliem noh Al-Hilal da 2-1 kol.
Ha kane ka jingïakhun, ka Al-Hilal, kaba dei ka club na Saudi Arabia ka la ïoh ban khyrwit ïa ka kol kaba nyngkong lyngba u Michael, shwa ba ki ar ngut ki rangïalehkai ka Al-Nassr, kata u Abdulelah Al-Amri bad u Nawaf Boushal kin shah beh na madan, namar ka jingïoh pdiang ‘red card’, hynrei ki ar tylli ki kol ba la ïoh khyrwit da u Ronaldo ki la biang pura ïa ka Al-Nassr ban rah ïa ka khusnam lahduh kaba nyngkong eh.
U Ronaldo uba la mynjur ban leit ïalehkai ha ka lympung Saudi Pro League ha u bnai Nohprah, u la lah ban ïarap ïa ka kynhun jong u, ban pyndep ha ka kyrdan kaba ar.
U Ronaldo ha kane ka lympung u la ïoh ruh ban khur ïa ka khusnam Top Scorer, watla ha kane ka lympung ki la don lang ki club kiba paw na ka ri Saudi Arabia, Qatar, United Arab Emirates, Iraq, Morocco, Tunisia bad Algeria.
U Ronaldo un dei ruh u rangïalehkai ba nyngkong ban jop ïa katei ka khusnam Top Scorer jong ka Al-Nassr bad ruh ban ïoh khyrwit kol ha ka final jong kane ka lympung.
