Bah I.R. Dkhar
Ki kam ha ki kam jngoh jngai pyrthei ne Tourism, ki long ki lad aikam aijam ia ki briew jong ngi hapoh Meghalaya. Ki paidbah jong ngi ki dei ban sngewthuh ïa kane. Ki kam jngoh jngai pyrthei, haba ngi ong ïa ka Jylla Meghalaya jong ngi, ka dei ym shuh kaba dang thymmai, hynrei kaba la slem. Naduh ki por mynhyndai, ki briew jong ngi ki sngewthuh ïa kane ka kam. Kane ka kam ka dei kaba khring ïa ki briew na la ka jong ka Jylla bad na bar. Haba ki wan wan kai ban jngoh ïa ki lum ki wah, ki them ki lynguh bad ki jingitynnad jong ki jaka hapoh kane ka ri Khasi Jaiñtia baieid jong ngi, ki briew jong ngi pat kiba shong ha kito ki thaiñ ki ioh kam ioh jam.Ki im da kaba buh buh ïa ki tiar ki tar, ka bam ka sa bad kiwei kiwei babun jait. Dei na kane ka daw ba katba nang mih ki sngi, ki briew kiba shong sha kito ki thaiñ ki nang pynbun, pynitynnad, pynbang ka bam ka sa bad kiwei kiwei. Ym tang katta, ki don ruh ki jingïalehkai kiba pynbyrngia laiphewjait. Ka daw ka long ba ki lum ki wah, ki them bad ki lynguh, kiba don kylleng ki jylla jong ka Meghalaya ka khring ïa ki briew. Ki khring ym tang ïa ki nong India hynrei ïa ki nongwei ne ki foreigners ba ngi ong na kylleng ki jaka jong ka pyrthei. ïa kine ki nongwan jngoh kai, ngi khot ki tourists. Kine ki tourists ki wan ki leit tang ban tip bad iohi da la ki jong ki khmat ia ki jingitynnat jong ki lum ki wah jong ka Meghalaya. Ki d a pynlut ruh ïa ka pisa nong India ha kita ki thaiñ kiba ki wan. Nangta haba ki la pyllut ïa ka pisa jong ki leit noh. Ki wan da ki por-ki-por, khlem kheiñ ia u slap, ka lyer, ka jingkhriat bad jingshit. Ha ka porlyiur ruh ki wan, ha ka por tlang por khriat ruh ki wan ban mad la la ki jong ki khmat bad ka met ka phad. Kumta sa dap ki hotel, ki restaurant, ki jaka jngoh kai bad kiwei kiwei. Ki wan khnang ban mad ïa kine ki jinglong jong ka pyrthei jong ka Meghalaya.
Na ka liang ka Sorkar Meghalaya ka la dep pynmih ïa ka skhim kaba ki khot Meghalaya Tourism Policy, 2023 ban pynlong ha ka liang ka Tourism ka jaka kaba yn khring ïa ki nongwan jngoh ha baroh kawei ka Jylla. Kumba la ong haneng, ka jingdon jingem kaba ktah ia ki tourist ka kynthup ïa ki jinglehkmen lehsngewbha (festivals), ki mrad khlaw (wild life), ka rukom im jong ki briew (culture) jong ki briew jong kane ka thaiñ, ki jaka nongkyndong, kiba kynthup ïa ka suiñ bneng bad ki mrad ki mreng, ki jingwad bniah ïa ki jaka bapher bapher, ka jingwan pynlut por ne ki pilgrimage tourism bad kiwei kiwei. Kine baroh ki pynlong ia ka ban pynkiew bad pynïar ia ka Tourism. Nalor kine, ki don ki jingpynbna lyngba ka Radio, Television bad kiwei kiwei ki jingpynbyngñia kiba khring ïa ka jing ïa ki briew napoh ri la jong bad nabar khamtam eh.Kane baroh ka long na ka daw ka ka jingitynnad kaba don hapoh Meghalaya ym kumba don sha kiwei pat ki jaka, ki krem ki kroh, ki syntai lum, ki kshaid ki jhaid, bad kiwei kiwei. Katba nang mih ki sngi, ki trai jaka bad ki briew na la ri la jong ki ialeh ban pynitynnad bad pynbha katkum ka juk ban khring ïa ki briew ban ioh ïa ka kamai ka jih.
Namarkata, ka la dei ka por ba ki samla kynthei bad shynrang khamtam ban shim ïa kane ka bynta kum ki lad ioh kam ioh jam namar ha kane ka pyrthei mynta ka long kaba eh ban ioh kam Sorkar. Ki dei ban leit pule bad pyntbit ha kane ka liang da ka jingïarap jong ka Sorkar bad kiwei kiwei ki Agency kumno ban rung sha kane ka kam Tourism kum ka lad ioh kam ioh jam bad ka jingim kaba wanrah ïa ka lawei kaba pynkiew bad pynroi shaphrang. Ka jingthmu bakongsan ka long ba ki samla jong ngi kynthei bad shynrang, ki dei ban don ka mon bad jingkwah ne ka interest na kane ka kam. Kumta kan kiew shaphrang.
