Washington, Nailar:
Katkum ki kaiphod ba la ioh lum da ki tnat syntiat jong ka United States, la shem ba ka tnat shipai jong ka China ka la syntiat tuh bad wad jingtip sop-sop na ka ‘Network’ jong ka Japan.
Ha katei ka kaiphod la ong ba ki nongsyntiat tuh ‘Cyber-spies’ jong ka People’s Liberation Army ki la leit phrung tuh ha ka ‘network’ jong ka Japan ban ioh tuh ia ki jingtip shaphang ki rukom treikam jong ka Japan.
Hadien ba la ioh ban iakren bad ki heh jong ka Japan, la ong ba kitei ki briew kiba leit wad jingtip be-aiñ bad rung jubor ha ka ‘network’ jong ka Japan, ki dei ki briew kiba don ha ka bor bad kiba don jingiadei ruh bad ka tnat shipai jong ka China.
La ong ba kane ka khubor ka la pyn kyndit ia ka Japan naba ka China ka la iohi ia ki rukom treikam bad ka la ioh ban lum jingtip sop-sop shaphang ki kam- ki jam jongka.
Ha kajuh ka por ruh, la ong ba ka Japan ka la ialeh katba lah ban pynkhlaiñ ia ki jingiada ban tehlakam ia ki nongsyntiat bad ki nong pyndonkam be-aiñ ia ka network jongka hynrei ka long kaba sngew lyngngoh ba da ki shipai ka China kin leit ban rung tuh hapoh jong katei ka network ba ki tnat ka Japan ki treikam.
