Guwahati, Nailar:
Ka jingshlei um ha ka jylla Assam sa shisien ka la ktah jur biang ïa ki nongshong shnong hadien ka jingwan hap jong u slap uba jur ha kine ki khyndiat sngi ba la leit. Haduh ba la thoh ïa ka khubor, ki la don kumba 27,000 ngut ki briew kiba la shah ktah jur ha ki 6 tylli ki distrik.
Ki 175 tylli ki shnong kiba hap hapoh ki 18 tylli ki Revenue Circles jong ka Dhemaji, Dibrugarh, Darrang, Jorhat, Golaghat bad Sivasagar distrik ki dang don hapdeng ka jingshlei um.
Ki la don kumba 44 tylli ki shnong kiba hapoh ka Jonai, Dhemaji, Gogamukh bad Sissiborgaon Revenue Circles kiba la shah ktah na ka jingwan jia jong ka jingshlei um, la ïathuh ki heh jong ka Assam State Disaster Management Authority (ASDMA).
Ka Sissiborgaon Revenue Circles ka dang sah ka thaiñ kaba dang shah ktah jur ha kaba ki la don palat 10,300 ngut ki briew kiba la shah ktah jur na ka jingbteng jong ka jingshlei um.
Kiba bun ki longïing ki la hap ieh bad mih na ki ïing jong ki ban leit sha ki jaka ba lait na ka jingshlei um hadien ba ka um ka la rung hapoh ki ïing jong ki.
Ka um ka la tap ïa kumba 396.27 hectares ki jaka rep tang kiba don ha Dhemaji distrik.
Ha kaba ïadei bad kane, ka jingshlei um ka la tap ïa kumba 2047.47 hectares ka thaiñ ba don ki jingthung jingtep ha ki 6 tylli ki distrik kiba la shah ktah jur na ka jingshlei um.
Ki bor ba dei khmih ki la shim ki lad ki lynti na ka bynta ban ai jingïarap ïa ki lanot kiba la shah ktah na ka jingshlei um ha kylleng ki jaka.
Ki briew ki la hap ban sah ha ki jaka sah ba shipor ba la pynbiang da ka sorkar naba ki ïing jong ki ki la shah tap ha ka um.
