New Delhi, Nailar:
Ka World Health Organization (WHO) ha kane ka por, ka la pynbna ia u khñiang jingpang Covid-19 ba thymmai- u EG.5 lane u ‘Eris’ kum uwei na ki khñiang jingpang uba wan hi na ka iing jong ki jait khñiang jingpang SARS-CoV-2 bad la ong ba utei u khñiang jingpang u la saphriang sha kylleng ki bynta jong ka pyrthei ha kane ka por, kynthup wat hapoh India.
Watla katta, la ong ba une u jait khñiang jingpang um da long eh uba ap jingma haduh katta ia ki paidbah bad u long hi kumjuh kumba long kitei kiwei pat ki jait khñiang jingpang Coronavirus ba la ju iohi bad ïohsngew baroh shi katta.
Namarkata, la ong ba u EG.5 lane u ‘Eris’, u long hi u nonghiar pateng lane uba wan kylla dur na ki khñiang SARS-CoV-2 bad u la wan paw pyrthei nyngkong eh ha ka 17 tarik u Rymphang jong une u snem 2023.
Kumta, ka World Health Organization (WHO) ha ka Sngi Balang jong ka taiew ba la lah, ka la pynbna ia utei u khñiang jingpang kum u ‘Variant of Interest’ (VOI).
