Moscow, Nailar:
Uwei u nongthoh kot jong ka Russia, uba la ithuh kyrteng kum u Dmitry Glukhovsky, ha ka Sngi Nyngkong jong ka taiew ba la dep, u la shah pynngat kyndon da kaba rai set patok haduh 8 snem ha ka ïingbishar jong ka Russia namar ka jingpyrshah jong u ia ka jingleit hiar thma jong ka Russia pyrshah ia ka Ukraine.
U Glukhovsky, u sah shabar jong ka Russia bad u la paw nam bha bad ki briew ki la ithuh bha ia u lyngba ka kot jingiathuh khana ‘Metro-2033’. Une u nongthoh u la don 44 snem ka rta.
La kem noh ia u hadien ba la ioh jingtip ba u pynphriang khubor sniew shaphang ki shipai jong ka Russia haba iadei bad ka jingphah leit hiar thma jong ka Russia sha Ukraine.
U Glukhovsky haduh kine ki sngi mynta, u la pyrshah jur ia ka jingleit hiar thma dusmon jong ka Russia pyrshah ia ka Ukraine kaba long ka para marjan ri jongka bad ka ri kaba dang rit ban ia-nujor bad ka Russia.
Hadien ka jingther ‘namding jong ka Russia ha Odesa ha u bnai ba la leit, utei u nongthoh u la pyllait ia kawei ka jingthoh shaphang kane hapoh ka Account Instagram jong u bad u da pruid dak sawdong ruh ia ka “Odesa” ha ryngkat ki symbol dohnud bad kumjuh ka jingthoh ‘Caption’ kaba u la thoh “Bi***es”.
Shuh shuh ruh la ong ba, ha ka por ba dap shi snem ka jingleit hiar thma ka Russia pyrshah ia ka Ukraine, utei u nongthoh u la pyllait ia kawei ka jingthoh bad ka jingkren jong u, ha kaba u la ong ba ha kane ka shi snem ba la leit, ka Russia ka la pynjot bad pyn julor ia ka ri kaba u ieid eh bad kata ka ri ka dei ka ‘Ukraine’.
U Glukhovsky u la ai jingkyrshan ruh ia u nongialam ka liang pyrshah- u Alexei Navalny, uba la shah rai set patok 19 snem namar ka jingpyrshah jong u ia ka sorkar Russia halor ka thma ha Ukraine.
