Jowai, Nailar 13
Ka Mulang Ialong Sports Club bad ka Dulong Sports Club ki la long ar tylli ki kynhun kiba la ïoh rung sha ka final na ka bynta ban ïaknieh ïa ka nam lahduh ka lympung Independence Day Cup Under-17 Football Tournament ïa kaba la pynïaid da ka West Jaiñtia District Sports Association (WJDSA).
Ka jingïoh rung jong Dulong Sports Club bad ka Mulang Ialong Sports Club sha ka final ka la wan hadien ba ki la lah ban khur ïa ka jingjop ha ka jingïakhun semi-final kaba long ha ka sngi Saitjaiñ ha Kiang Nangbah Stadium.
Haba phai sha ka jingïalehkai semi-final kaba nyngkong, ka Mulang Ialong kala lah ban pynliem noh da 2-0 kol ïa ka Mukhla Raij Sports Club. Ïa kine ki kol la thep da u Charelang Mulieh ha ka minit ba 43 bad u Chalet Phawa ha ka minit ba 54.
Haba phai pat sha ka jingïakhun semi-final kaba ar, ka Dulong kaba heh ka bok ka nusip kat u prah ka la pynliem noh ïa ka Demthring lyngba ka jingshut tie breaker da 2-0 kol, hadien ba ka jingïakhun ha ka por kaba buh kala wai khlem da don mano mano ki ban ïoh ban pynkhih jar.
Kumta ka jingïalehkai final hapdeng kitei ki ar tylli ki kynhun la khmih lynti ba kan long kaba itynnad bad kaba ïakhaid bha khamtam ba baroh ar liang kin ïakhun tyngeh ban ïoh ban rah ïa ka nam lahduh jong katei ka lympung bad khur ïa ka khusnam.
