Shillong, Nailar 13
Ka Umphyrnai Sports Club bad ka PFR Football Academy ki la ïoh rung sha ka final jong ka lympung SSA U-14 (Boys) Football League 2023 ba la pynlong da ka Shillong Sports Association (SSA).
Kane ka jingïoh rung final jong kitei ki kynhun, ka la wan hadien ba ki la khur jingjop ha ka jingïakhun semi-final kaba la long ha ka sngi Saitjaiñ ha madan Polo.
Haba phai sha ka jingïalehkai semi-final kaba nyngkong kaba la long ha ka por 2 baje nohphai sngi, ka Umphyrnai Sports Club ka la lah ban pynliem noh ïa ka Mawreng Sports Club da 1-0 kol bad ïa kane ka shi kol la ïoh ban khyrwit da u Bankyrshanbor Kharkongor ha ka minit ba 9.
Ha ka jingïalehkai semi-final ba ar kaba la long ha ka por 3.45 janmiet, ka PFR Football Academy ka la lah ban pynliem noh ïa ka Mawlai Sports Club da 2-1 kol.
Ka jingïalehkai hapdeng kine kynhun ka la long kaba itynnad bad ïakhaid naba baroh arliang mamla ki la ïakhun tyngeh naduh kaba sdang bad dei ka Mawlai kaba la ïoh ban khyrwit ïa ka kol kaba nyngkong ha ka minit ba 15 lyngba u Iaisonlang Dohling hynrei tang hadien 2 minit, kata ha ka minit ba 17 ka PFR ka la ïoh ban pynphai ïa kane ka shi kol lyngba u Kevinson Synrem bad dei ha ka minit ba 58 ba ka PFR ka la ïoh ïa ka kol jingjop ba la khyrwit da u Jonwery Marwein.
