Chicago, Nailar:
Ha kane ka khubor, la ong ba kawei ka khynnah 9 snem ka la shah siat iap ha u para marjan katba ka dang lehkai ha ka thuk-thuk ha ryngkat ka bam ‘Ice-cream’ ha katei ka por. Hynrei la ong ba kynsan utei u para marjan uba iaid na shiliang jong ka surok, u la siat ia katei ka khynnah na ki bynta jong ka khlieh bad kane ka la jia ha ka Sngi Saitjaiñ.
Ki bahaiing jong katei ka khynnah, ha katei ka sngi ki la pynpaw ia ka jingsngewsih kaba jur halor ka jingduh noh jongki ia la ka jong ka khun dang ha katei ka rta bad ha ka jingjia ka bym shym poi pyrkhat eiei namar kumba ju long man ka por, katei ka khynnah ka long ka khynnah kaba baroh ki ieid bad sngewtynnad namar ka jinglong ba bha jongka. Hynrei khlem kano- kano ka daw, ka long kaba sngew lyngngoh ba balei utei u para marjan jongki, u shun bad u leit siat dusmon ia katei ka khynnah rit ha katei ka sngi.
Ki bor ka aiñ ki la bat noh ia utei u briew, uba la ithuh kyrteng kum u Michael Goodman bad uba la don 43 snem ka rta. La pynngat ruh ia u hapoh ki kyndon pynkheiñ aiñ kiba iadei bad ka jingpyniap briew bad la kem noh ia u khlem ka jingbuh dor ban bahjamin ia u hapoh ka patok kaba don ha Cook County.
U Goodman u sah ha ka iing kaba don mar shiliang surok bad ka iing jong katei ka khynnah bad ia katei ka khynnah la ju khot da ka Serabi. Hynrei kaba sngew lyngngoh ka long ba ki bahaiing katei ka khynnah ki iathuh ba kim don jingithuh eiei bad utei u briew.
