Seoul, Nailar:
U nongialam jong ka North Korea, u Kim Jong Un ha kane ka kynti, u la bitar bad tim ia ki heh jong ki tnat ba dei khmih hapoh ka ri halor ka jingbym lah ban tehlakam ia ki jingeh jong ki paidbah haba iadei bad ka jingshah lynshop ha ka ‘eriong kaba la leit iaid lynti sha ki bynta jong katei ka ri ha ka taiew ba la lah.
La ong ba ka ‘eriong ka la leit ban lynshop ia ki bynta ba khappud jong ka Japan hashwa ba kan leit iaid lynti sa sha ki thaiñ jong ka North Korea ha ka Sngi Thohdieng, ha ryngkat ruh bad u ‘lapbah uba jur bha khamtam ha ki thaiñ North.
La ong ba ki bor jong ka mariang ki ju lynshop khah- khah ia kane ka ri namar ki jingtlot jong katei ka ri haba iadei bad ki rukom tei jongka, kumjuh ruh ka jingpom dieng palat pat ka la wanrah ia ki jingshlei um ba khah- khah hapoh North Korea.
Haba leit jurip sha ki thaiñ ba mad ia ka jingshlei um ha Anbyon County, u Kim u la ong ba katei ka thaiñ ka long ka bynta kaba la kham shah ktah jur tam eh ban ianujor bad kiwei pat ki bynta jong ka ri.
Kumta, u Kim u la ong ba ki heh ba dei khmih jong katei ka thaiñ, ki long ki bym kit khia bad kim shym la leh kano- kano ka ban iada ia ka jingshah ktah jur jong katei ka thaiñ naduh ki por ba la ioh ia ki jingmaham ha ki tnat ba dei khmih suiñ bneng.
