Dubai, Nailar:
Katkum ki khubor, la iathuh ba uwei u briew u la shah kem noh hadien ka jingsynreit kuli naphang ha ka jaka mane Muslim Shi’ite kaba don ha ka thaiñ Shiraz jong ka thaiñ Shathie ha Iran kaba la jia ha ka Sngi U Blei ha kaba iwei i la duh noh la ka jingim ha katei ka jingjia.
Ki lad pathai khubor jong ka Iran ha ka Sngi Nyngkong ka la pyntip ba ki don kumba 4 ngut eiei kiba la ngat bad mynsaw jur na katei ka jingsiat ha katei ka Sngi U Blei.
Kane ka la jia ha ka por kumba 7 baje eiei, ha kaba uwei u lehnoh ha ryngkat ki tiar siat, u la leit rung sha katei ka jaka bad u la sdang da kaba synreit kuli naphang. Hynrei hadien kumba katto- katne por, ki bor pahara ki la ioh ban kem noh ia utei u lehnoh, la iathuh u Mohammad Hadi Imaniyeh, uba long u Lat jong ka Fars Province bad la ong ruh ba uwei u briew u la khlad noh ha katei ka por.
Hynrei ki don kumba 7 ngut kiwei pat kiba la ngat bad mynsaw ha katei ka jingsiat, kynthup ia 2 ngut ki dkhot jong katei ka jaka mane bad 2 ngut pat ki nongialam niam bad la phah khang khyrdep noh shwa shipor ia baroh ki dukan kiba don ha katei ka jaka katba ka jinglong-jingman kam pat shngaiñ bha. Bad la pyn-ap pahara bad phah ker kut noh da ki bor pahara ia katei ka thaiñ baroh kawei hadien jong katei ka jingjia.
Tad haduh jong ka step Sngi Nyngkong, ym pat shym la don ba kam ne shim jingkit khlieh halor katei ka jingbthei ha katei ka jaka mane Shah Cheragh, hynrei la shu tip ba ka dei ka kam thombor jong ki kynhun lehnoh na Iran hi. Ka Islamic State (IS) ha u Risaw jong u snem ba la leit, ka la leit thombor dusmon ia kawei ka jaka mane Muslim ha kaba 15 ngut ki la khlad ha katei ka por.
Bunsien hi na ki kam thombor kiba jia hapoh Iran, la ju kam trai bad shim jingkit khlieh hi da katei ka kynhun lehnoh Islamic State (IS), naduh ka jingpynbthei bom ba shyrkhei ha u snem 2017 bad kiwei kiwei de.
Haba iadei bad kane, la ong ba katkum ka video ba la ioh lyngba jong ki camera ba la pyndait ha kitei ki jaka, la iohi ia kitei ki paidbah riewngeit Muslim ba ki leit ban rung sha katei ka jaka hadien jong katei ka jingbthei, ban leit wad ia la ki jong- ki bahaiing- hasem bad ban ioh pyllait im lada ki dang lah ban pyllait im ia ki.
