Kyiv, Nailar:
Ha ka Sngi U Blei, 7 ngut ki briew ki la khlad noh kynthup ia iwei i khyllung kynthei ha ryngkat u hynmen ba 12 snem bad kumjuh ruh ryngkat bad ki kmie-ki kpa hadien ba u ‘namding ba la siat da ki shipai ka Russia u la leit hap ha ka jaka ba sah briew ha ka thaiñ Shathie jong ka Ukraine hapoh ka nongbah Kherson.
Napdeng jong kitei kiba khlad, uwei u dei u Pastor bad kumjuh ruh 13 ngut pat ki la ngat bad mynsaw ha katei ka jingjia ha ka Sngi U Blei.
Kitei ki 3 ngut ha ryngkat bad 2 ngut ki khynnah rit, ki dei kiba khlad hapoh ka shnong Shyroka Balka, kaba don hapoh ka nongbah Kherson, ha kaba kitei ki khynnah rit 2 ngut, ha ryngkat ka kmie lem bad u kpa ki la duh noh ka jingim ha ka jingbthei jong u ‘namding u ba la leit hap bad bthei ha ka jaka sah jong ki.
La ong ba ki tnat iarap ki la ialeh ban pyllait im ia utei u khun ba 12 snem hynrei u la khlad noh tang hadien khyndiat kynta ba la pynpoi ia u sha jaka sumar ha katei hi ka sngi.
Katba, ha ka shnong Stanislav pat, 2 ngut ki rangbah ba 57 bad 71 snem, ki la khlad noh ha ka jingbthei jong uwei pat u ‘namding ba la siat da ka Russia bad uwei napdeng kine u dei u Pastor.
Kumjuh ruh la ong ba sa 13 ngut pat ki dei kiba la mynsaw na katei ka jingbthei u ‘namding ha katei ka shnong Stanislav.
Namarkata, ki nong-ialam ka Ukraine ki la pynpaw ka jingsngew khia kaba jur halor ka jingduh noh ia kitei ki mynsiem briew ba lui-lui bad ki la smai ruh ban pynhiar kput ia ka Russia namar ki la ong ruh ba ym dei ban ailad ia kitei ki jait kam thombor jong ki lehnoh bad dei ban pynduh jait syndon ia kum kitei ki kam thombor jong ki lehnoh.
Ka Kherson ka long kawei napdeng ki 4 tylli ki thaiñ jong ka Ukraine, ba u President ka Russia- u Vladimir Putin u la pynbna ha u snem ba la leit ba katei ka bynta ka la hap hapoh ka jingsynshar bad ha ka kti ka Russia.
Hynrei, la ong ba watla ki shipai ka Russia ki la mih noh na katei ka nongbah Kherson ha u snem ba la lah, katba ka Russia ka dang phah thombor bad phah ther ‘namding man ka por sha katei ka nongbah.
