Khliehriat, Nailar 14
Ka Moosianglamare New bad ka Wahsanphaw SSC ki la khur jingjop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka Moosianglamare New ka la pynliem noh ïa ka Moopala SC da 2-1 kol, katba ka Wahsanphaw SSC ka la jop da 4-0 kol ïa ka Umlong United ha madan artificial turf ha Diengshynrum ha ka Lah Sngi U Blei.
Ha ka jingïakhun kaba nyngkong, ka Moopala SC ka la ïoh ban pynkhih jar nyngkong ha ka minit kaba 6 lyngba u Phrangki Shadap, katba ka Moosianglamare New ka la ïoh ban pynphai haduh ar kol ha ka minit kaba 21 ba la thep da u Firsterjoy Pariat bad ka minit kaba 38 ba la thep da u Nangjop Nongtdu.
Ha ka jingïalehkai kaba bud hapdeng ka Cham Cham SC bad ka Tuber Shohshrieh ki la ïasam mar shi point hadien ba ki la ïakhaid mar 1-1 kol.
Ïa ka kol jong ka Cham Cham SC la thep da u Raymon Phawa ha ka minit kaba 16, hynrei hadien shiteng kynta ka Tubershohshrieh ka la lah ban pynphai kylla lyngba u Salai Rymbai ha ka minit kaba 39.
Haba phai sha ka jingïakhun kaba khatduh, ka Wahsanphaw SSC ka la jop da 4-0 ïa ka Umlong United. Ïa kine ki kol jong ka Wahsanphaw SSC la thep da u Karlin Lyngdoh ha ka minit kaba 31, katba u Delight Lyngdoh (38 & 46) u la thep ar kol bad ïa kawei pat la pynbud da u Mebantei Suchiang ha ka minit kaba 78.
