Dakota, Nailar:
Ha kane ka khubor, la ong ba uwei u khynnah 13 snem na North Dakota, u la lait im hadien ka jinghap jong u na ka jingjrong kumba 100 phut ha Grand Canyon katba u dang leit shang kai bad la ki bahaiing- hasem.
La iathuh ba ka la shim por kumba 2 kynta tam ia ki kynhun iarap ba kin ioh ban tan bad pyllait im ia utei u khynnah ba la ju tip kyrteng u Wyatt Kauffman, hadien ba u la hap najrong jong ka jaka jngoh kai ba paw nam bha jong ki riew shang kai pyrthei ha North Rim.
Ia utei u khynnah, la shu rah noh da ka liengsuiñ bad la pynkit sha ka jakasumar kaba don hajan jong katei hi ka thaiñ bad ki doktor na katei ka jaka sumar ki la iathuh ba ki don haduh 9 tylli ki shyieng ba la kheiñ ha ka met jong utei u khynnah, ha ryngkat ki jingshitom ha u klongsnam bad kumjuh ruh kiwei kiwei ki jingshitom namar ka jinghap jong u ha katei ka jingjia.
La ong ba ha katei ka jingjia, utei u khynnah u dang ailad ia kiwei pat ki briew ba kin tur shakhmat bad ban kin ioh ban iashon dur, hynrei dei ha mar katei ka por ba u la kum syntuid bad hap shapoh riat khlem da ioh jaka bat shuh ban pynsneh ialade.
Shuh shuh ruh utei u khynnah u la iathuh ba, ha katei ka por ba u hap, u la ioh bat ia uwei u maw ha mar shiteng jong katei ka riat hynrei namar ka rukom bat jong u kam da skhem bha, u la btuit bad hap biang haduh ba un da tyngkhuh madan.
Hadien ka jinghap jong u, um shym kynmaw eiei shuh namar ka jingbym tip briew shuh ha katei ka por.
Hynrei u la shu sngewthuh ba la pynkit ia u hadien ka kali kit nongpang, hynrei ba kam dei ka kali bad ka dei ka liengsuiñ ‘helicopter’ bad hadien kata la pynkit ia u sa ha kawei pat ka liengsuiñ ‘Plane’ haduh ba un da poi ha katei hospital.
