Shillong, Nailar 14
U rangïakura ka Jylla u Shanborlang Marbaniang un pynkhreh ban kiew rynsan sa ha kawei pat ka lympung ïakura ba la tip kum ka United Professional Boxing ka ban long ha nongbah Delhi ha ka sngi Ba-ar kaba long ka jingrakhe laitluid ka ri India kaba 77.
Ha kane ka jingïakhun, u Shanbor un pynkhreh ban ïakhun pyrshah ïa u Prasad Katnoor ha ka Super Fly Weight 52kg.
Kane ka long ka sien ba saw ba une rangïakura un pynkhreh ban kiew rynsan ha ka Professional Boxing naduh ba u la khur jingjop teng ha ka Marine Pro Boxing Promotion ha u snem 2022 kaba la long ha Mumbai, katba u la ïakhaid pat ar sien ha ka Professional Boxing kaba la long ha u snem 2022 bad 2023 ha Manipur.
U Shanbor, 24 snem ka rta, u dei u khun ba phra napdeng ki shiphew ngut ki khun jong ka Kong Siplinda Marbaniang ba sah ha Pdengshnong, Umlyngka kaba ha Upper Shillong.
Ka jingïaid lynti u Shanbor ha ka kam ïakura ka la ïaid mynta la 13 snem kynthih kata naduh u snem 2010, hynrei haduh mynta um shym la kynrandien namar ka jingangnud ka jong u ka long ban khur ïa ka nam lahduh ne ka Belt khnang ba kan long ka jingmyntoi ba un nang jam shaphrang ha ka kam ïakura.
Haba ïakren bad u nongthoh khubor, u Shanbor u la pynpaw ïa ka jingsngewkmen ban ïoh biang ïa ka lad ha kane ka kynti ban leit ïashim bynta ha katei ka rynsan ïakura. “Kane ka long ka sien kaba saw kaba ngan leit ïashim bynta. Wat la nga la jop shisien bad ïakhaid ar sien, hynrei ha kane ka kynti kaba mynta nga khmih lynti ba ngan ïalehkai bha bad ban pynurlong ïa ka jingjop.”
“Nga la long ba la pynkhreh na ka bynta kane ka rynsan ïakura ka ban long ha nongbah Delhi bad ka jingangnud ka jong nga ka long ban khur ïa ka jingjop khnang ba kan long ka jingmyntoi ïa nga kum u rangïalehkai,” u la bynrap.
Na ka liang u Coach u Bah Ranold Nongsiej u la pynpaw ka jingsngewkmen ba ma u kum u coach u la ïoh ban ai jinghikai pura na ka bynta jong u. “Ngi khmih lynti ba un ïalehkai bha bad ba un khur ïa ka jingjop khnang ba kan long ka burom ïa ka Jylla hi baroh kawei.”
Ha kawei pat ka liang, u Franky Momin, General Secretary ka Meghalaya Professional Boxing Council (MPBC) u la pynpaw ka jingsngewkmen ba kum ka synjuk ka la lah ban sei biang ïa u Shanbor ba un leit ïakhun ha katei ka rynsan ïakura ka ban long ha nongbah Delhi.
“Kumba u Shanbor u la ïoh ka jingshah hikai ba pura lyngba ki Coach la kumba katto katne por, ngi ai ka jingkitbok kitrwiang ba un ïalehkai bha khnang ba un lah ban khur ïa ka jingjop ha kane ka sien kaba saw,” u la bynrap.
Te kumta u Shanbor u la mih na kane ka nongbah ha ka step jong ka Lah Sngi U Blei ban leit sha Delhi.
Kum ban shu pynkynmaw, kane ka United Professional Boxing ka dei kaba la pynïaid da ka Indian Boxing Council (IBC), kaba la ïasoh sha ka World Boxing Council (WBC).
