Jowai, Nailar 14
Ka Mukhla Umlangchor, ka Newhill, Madan Thadmuthlong bad ka Mookyrdup ki la jam sha ka quarter final ha ka lympung ïalehkai 3rd Division Football Tournament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA).
Kane ka la wan hadien ba ki la khur jingjop ha ka pre-quarter final kaba la long ha madan Kiang Nangbah Stadium Ladthadlaboh, Jowai ha ka Lah Sngi U Blei.
Ha kane ka jingïakhun pre-quarter final kaba nyngkong, ka Mukhla Umlangchor ka la pynliem noh ïa ka Risingsun Mukhla da 2-1 kol. Ïa kine ki ar kol la thep da u Niawkor Sari (49 & 51), katba ka Risingsun ka la lah ban pynphai kylla shi kol lyngba u D .Nongrum (65).
Ha ka jingïakhun kaba bud, ka Newhill ka la jop da 2-1 kol ïa ka Mookaswan Dongwah. Ïa ki kol jong ka Newhill la thep da u Thaura Nampui (40+1) bad u Dawanlang Laloo (41), katba ïa ka kol jong ka Mookaswan la thep da u Slim Marboh (69).
Kumjuh ka Madan Thadmuthlong ka la pynliem noh ïa ka Lumbhahdakha lyngba ka tie-breaker da 4-2 kol.
Haba phai sha kawei pat ka jingïakhun kaba khatduh, ka Mookyrdup ka la jop da 5-2 kol ïa ka luti Tuber Ïalong. Ïa ki kol jong ka Mookyrdup la thep ar kol da u Nickyboy Swer (9 & 28), bad ïa kiwei pat la pynbud da u Famous Plain (20), u Dennis Passah (45) bad u Nidaiar Kamar (64). Katba ki kol jong ka Luti tuber la thep da u Leader Mulieh (38) bad u Francis Pale (78).
