D. H. Kharkongor
Ka Sorkar India ka don jingthmu ban tei haduh 21 tylli ki Green Field Airport ha kylleng ka Ri India. Ka thong ka jong ka long ym tang ban pynïasnoh (connect) ia ki Sor-bah (Major Cities) jong ka Ri India tang da ki Surok bah ne ki ‘Roadways’ lem bad da ki lynti rel ne ki ‘Railways’ hynrei wat da ki lynti suin ne ka ‘Airway’ hi ruh. Na kane ngi lah ban sngewthuh ba ka Sorkar India ka kwah ba uba bun un ioh lad ban leit ban wan da ki liengsuin.
Ka Sorkar India ka shat jingmut sha ki Green Field Airports hadien ba ka ithuh ïa ka jingkhim than eh ka jong ki sawdong sawkun ka jong ki kad liengsuiñ kiba don mynta ha ki Sor-bah, kaba lem bad ki jingeh kiba bun kiba mih na kane ka jingkhim than eh. Kawei na ki daw bah ka dei ka jingkut lad kut lynti ban pynheh pynïar shuh shuh ïa ki kadliengsien kiba lah don lypa ha ki Sor-bah. Lah namar kata ban ong ba ka jingthmu ka jong ka Green Field Airport ka long ban ïarap ban pynsting ïa ka lyng-kor jong kano kano ka kad Liengsien kaba lah dep don lypa ha ki Sor-bah.
Ka Greenfield Airport ka dei ka kadliengsuiñ kaba thymmai, ïa kaba yn sdang ban tei naduh na sdang. Yn tei ïa ka ha ka jaka kaba thymmai, ha kaba ym pat don kano kano ruh ka jinglushia u khunbynriew ia ka sawdong ka sawkun ka jong ka. Na kane ngi lah ba sngewthuh ba kan dei beit ka jaka kabathymmai, ka ban pajih ruh tang khyndiat na ka Sor. Ka dei ban dei ka jaka ha kaba ym pat don kino kino ruh ki dak ki shin jong ka jingdep ban muslia u khunbynriew ïa ka sawdon ka sawkun ka jong kane kaba ym pat don lypa kano kano ruh ka jingtei ka ban pynthut pynwit ia ka kam. Na kane ngi lah ban sngewthuh shaikdar ba ka jingtei ïa ka Greenfield Airport kan hap ban sdang naduh na sdang ha kaba baroh kiei kiei kin long kiba thymmai, kata naduh ki ‘terminals’, ki ‘runways’ ne ‘taxiways’, ki ‘hangars,’ tad haduh kiwei kiwei de ki jingtei kiba kongsan.
Kumba ka long mynta ka Shillong (Umroi) Airport ka biang beit thik tang na ka bynta ki liengsuin kiba khamrit, kiba tang kum ki ATR bad ki Bombardier. Kumba long mynta katei ka kad liengsuin ka dang rit than eh. Kam pat biang na ka bynta ban hiar bad ban kiew ki liengsuin kiba kum ki A320 bad ki A321 ne ki liengsuin kiba kham heh bad kiba kham ïar. Ka jinglyngkot than eh jong ka ‘runway’ ka jong ka lem bad ka jingpynwit jong ki lumrit kiba don ha sawdon jong ka ki dei ki daw bah ba ki liengsuin kiba kham heh bad kiba kham ïar, kiba kum ki A320 bad ki A321, kim lah ban kiew na ka bad ban hiar ha ka.Yn donkam namar kata ban kham pynïar bad ban kham pynjrong shuh shuh ïa ka ‘runway’, na kaba ka long mynta. Yn donkam ruh ban mait pynlyngkot noh ïa kat ki kliar jong ki lumrit kiba don sawdong jong ka. Hap ban leh shwa kumta wei ba ki liengsuin kiba heh bad kiba ïar ki donkam ban iohi lypa kyndiang, naduh kham nalor bad na kham jngai, ia ka ‘runway’ ka jong ka. Ka kam kan long kaba radbah bad ka jnglut jingsep na ka bynta kat kata ka kam radbah ruh kaba khraw bah. Halor kine ki ar ki nongrim ba ka Sorkar Meghalaya lem bad ka Airport Authority of India (AAI) ki sa shat jingmut noh sha ka Greenfield Airport.
Ha kaba ïadei bad kata ka Shillong Greenfield Airport ba ka Sorkar Meghalya ka donkam ban ioh shwa ïa ka jaka kaba kynsai, kaba ym duna ïa ka 800 acre. Ka jaka kaba, kat kumba her ka tyngab, ym dei ban jngai palat ïa ka 20 Km na ka pdeng jong ka Nongbah Shillong, kata, naka ophis jong u DC ka East Khasi Hills. Kam dei ruh ban pajih than eh na ka surok-bah Shillong – Guwahati. Tang na kine ki kyndon shwa ruh ba kaba kum kata ka jait jaka kan hap ban don ha ki thaiñ Shatei bad Shatei Lam Sepngi jong ka Sor Shillong. Kumta ka Sorkar Meghaylaya lem bad ka Airport Authority of India ki la pyrshang ban wad shitom ïa kaba kum kata ka jait jaka, kaba yn biang tam eh na ka bynta ban tei ïa kata ka Shillong Greenfield Airport. Shipor ki la shat jingmut ban pynurlong ïa kata ka Shillong Greenfield Airport ha katai ka thaiñ Diengpasoh, kaba markhap bad ka New Shillong Township.
Ka jingthmu kaba kting naduh ïa ka jingmut ka jingpyrkhat tad haduh ïa ka mynsiem ka jong ki heh saipan kiba mlien ïa ka kam khaii jaka puta. Ki heh saipan kiba skuin ban mareh leit thied jaka shata sha kaba ki khmih lynti ba kan urlong kata ka Shillong Greenfield Airport. Lah thikna ba, ha kum kane ka jaka lum, ka Sorkar Meghalaya bad ka Airport Authority of India kin nym lap kin nym shem ïa kaba kum kata ka jaka kaba kynsai, kaba haduh 800 acre bad kaba jngai ruh tang kumba 20 Kms namar pdeng jong ka Sor Shillong. Thikna ruh ba kin sa mih shibun bah ki jyrwit jyrwat ha kaba ïadei bad ka kam jaka nalor ba ka dor jong ka jaka ruh ka ban heh bah.
Te ym sngewphylla ba balei ba ka Sorkar Meghalaya ka hap keiñ noh ia ka jing-thmu ka jong ka ban pynurlong ia ka Shillong Greenfield Airport ha katai ka thaiñ Diengpasoh. Ka jinglut jingsep, ka por bad ka bor ban pynurlong ïa kat kata ka Shillong Greenfield Airport ruh kan kham palatliam ban ïa kabaynpynlut pynseppynban ha kaba kyntiew kyrdan ia ka Shillong (Umroi) Airport, na kaba ka long kumne mynta, kata, kat ban long ban kiew ban hiar ki liengsuin kiba kham heh bad kiba kham ïar. Lah ban ong ba ka Sorkar Meghalaya ka la kum bam jakhluid ha kaba ïadei bad kane ka kam.Ka jingbam jakhluid kaba pynbor bam ja khluid lem wat ïa ki katto katne ki heh saipan kiba ju kamai spah na ka kam khaii jaka puta. Kaba pynbor ba ki ruh kin ïa rah khun miaw biang sa shisien kum ba rah khunmiaw ma ka.
Ngi donkam, ynda haba bishar bniah bha na baroh ki liang, ba ngin don lem noh la ka kadleingsuin kaba kum ka Lokpriya Gopinath Bordoloi Airport, Guwahai, kaba jngai ruh tang kumba 24 Kms na kane ka nongbah Shillong. Ngi lah donkam ruh de ban don lem noh ia la ka jong ka kadRel, kaba kum ka Guwahati Railway Station. Katba ngin pat lah ban don hi noh ïa la ki jong ba ka jingmyntoikandang ïai long ïa ka Asom (Guwahati) katba ka jingduh jingmyntoi pat de kan ïai long ïa ngi.
