Kano, Nailar:
Katkum ki khubor la ong ba 26 ngut ki bor pahara jong ka Nigeria ki la shah siat iap na ka jingthombor ki kynhun runar ha ki phang Pdeng jong ka Nigeria ha ka miet Sngi U Blei, ha kaba kumba 8 ngut kiwei pat ki la mynsaw bad kumjuh ruh kawei ka liengsuiñ kaba leit ban iarap ka la hap bakla namar ka jingthud ha ka rukom treikam ha katei ka miet.
La ong ba katei ka liengsuiñ ‘helicopter’ kaba leit ban iarap ha katei ka sngi ruh, ka la hap noh ha ka step Sngi Nyngkong ha katei hi ka jaka, ha kaba ki bor pahara ki iakhun pyrshah bad ki kynhun runar bad ym shym la ioh khubor shuh la kito kiba shong ha katei ka liengsuiñ ki dang im ne kumno ruh.
Ki 2 ngut ki heh ka tnat shipai kim shym treh ban pynpaw kyrteng namar kim don bor ban kren eiei halor katei ka jingjia, katba ki heh jong ka tnat shipai kiba dei ban kren pat kim shym la ai jingpynshai eiei.
Ha katei ka jingiakhun, 23 ngut ki bor pahara ki la kyllon iap, kynthup ia 3 ngut ki heh shipai bad 3 ngut ki riew paidbah. Katba 8 ngut pat kiba mynsaw ki dei ki shipai hi, kiba iakhun ha katei ka jingiasiat markylliang.
La ong ba ha katei ka sngi, ka jingiakhun ka long kaba la jur haduh katta bad baroh arliang ki la mad ia ka jingduh nong bad ka jing julor kaba khraw. Nalor kata, wat katei ka liengsuiñ ba la phah sha katei ka jaka ban leit iarap ruh ka la hap noh bad baroh ki laiñ ban iakren phone ruh ki la thud bad ym shym la ioh ban pynshai ne ai jingtip sha kiwei pat ki tnat.
La ong ba katei ka liengsuiñ ka dei kaba kit ia 11 ngut kiba khlad bad 7 ngut pat kiba mynsaw na katei ka jaka ba iasiat. Hynrei katei ka liengsuiñ ruh ka la hap noh hadien ba katei ka kynhun lehnoh ka la siat bad ther kuli wat ia katei ka liengsuiñ kaba wan ban kit ia kitei kiba khlad bad mynsaw ha katei ka sngi.
Ki tnat wad bniah ki dang leit ban wad ia kito kiba hap baroh ioh don kiba dang lait-im bad kiba dang lah ban pyllait im bad ha kajuh ka por ruh ki dang wad ia ka daw bad ka jingshisha halor ka jinghap jong katei ka liengsuiñ ha katei ka jingjia.
La ong ba ia katei ka kynhun runar, kaba kum ki kynhun lehnoh hi, la ju tip ia kitei ki runar kum ki ‘Bandits’. Kitei ki runar ki dei kiba ju don bynta ha bun tylli ki kam thombor kum ka jingrah bor bad ka jingleit thombor ha ki skul, ki jaka pule bad kumta ruh kaba la don ia ka shlem treikam kaba skhem bad kaba heh ha ka khlad ha Kaduna, Zamfara bad ha Katsina jong ka Nigeria.
Shuh shuh ruh la ong ba ka thaiñ Shatei-sepngi bad ka thaiñ Pdeng jong ka Nigeria, mynta la bun snem ka la shah thombor ha kitei ki runar ‘Bandits’, kaba la leit ban thombor, leh bor bad ban pyniap dusmon ruh ia ki paidbah nongshong shnong bad kitei ki runar ki ju rah bor ruh ia ki nongshong shnong ban ioh dawa pisa ia ki bor pyniaid jong ka ri.
