Shillong, Nailar 16
Wat la ka la don ka jingdap um ka madan ïalehkai phlang plastik ne artificial turf ha 1st Ground Polo ne ka SSA Stadium, hynrei na ka liang u karikor ba pyntrei ïa katei ka projek u la ong ba ka madan ka la biang ban ïalehkai hynrei ka dei tang na ka daw bym pat ïoh ka jaka ban pyntuid ïa ka um na katei ka jaka ha ka por slap.
Katei madan myn ha ka 14 tarik u Nailar, 2023 ka la paw ki dak ki shin ka jingpyntrei torti ha kaba ka um ka la dap ha kiba bun ki bynta jong katei ka madan tang hadien ar kynta mar ïa rang u slap bad la hap ban pynsangeh ïa kawei na ki jingïalehkai jong ka U-20 Fourth Division.
Hynrei kat kum ka jingkam da utei u karikor la ong ba katei ka madan ka dei kaba biang eh ban ïa kiwei ki madan ba la shna da kane ka kompani kum ïa ka Madan Heh Mini Stadium ha Mawlai Phudmuti, ha Mawkyrwat bad ha Kiang Nangbah Stadium kaba ha Jowai.
U la pynpaw ha ki lad pathai khubor ha ka 16 tarik u Nailar da kaba ïathuh ba kane ka madan ka la biang hynrei ka dang don kawei ka bym pat lah ban pyndep bad kata ka long halor ka nala ban pyntuid ïa ka um na 1st ground shabar na ka madan namar ki dang don ki kynrum-kynram hapdeng ka States Sports Council of Meghalaya bad ka Shillong Recreation Ground Trust bad dei kane kaba la buh jingeh ban sdang ïa ka kam kaba dangsah.
Te kumta u la ïathuh ba ïa mynta shi por lada jur bha u slap, ka kompani ka la hap ban bud da u briew u ban pump ïa ka um baroh 24 kynta na katei ka nala jong ka 1st Ground khnang ba kan ym ktah ïa ka madan.
Shuh shuh utei u karikor u la ong ba kumba ka long na kaba rim, la kyntiew sa kumba 400 mm ka jingjrong bad ia kane la pyndap da ka khyndew.
Haba kylli la ïa katei ka madan la lah ne em ban bteng ïa ki jingïalehkai phutbol, utei u la ong ba lada long kawei lah kan hap ban sangeh shwa ïa baroh ki jingïalehkai khnang ba kan ym pynthut ïa ki jingïalehkai kiba dangsah.
Lah ban pynkynmaw ba tang hadien mar ïa dep ban siang ïa u phlang plastic la lah ban pynlong ki ar tylli ki jingïalehkai ha la ïing jong ka wat ba khatduh ha ka Second Division League, kumjuh ïa ka final jong ka Meghalaya State League, ka phutbol final jong ka North Eastern Council (NEC) lem bad ki lympung ïalehkai jong ka Shillong Sports Association.
