U Nongsaiñ Hima, 1969
Ha ka snem 1962 la jied MP ïa u Prof. G. G. Swell bad MLA ïa u Babu W. Reade (Shillong), Bah H. E. Pohshna (Jowai), S. D. D. Nichols Roy (Sohra), B. B. Lyngdoh (Nongpoh) bad H. S. Lyngdoh(Nongstoin). Hadien ba la jied ïaki, kitei ki MLA (lait noh u Bah H. E. Pohshna) ki la risaiñ. U Prof. G. G. Swell u sah hi kum u MP. Ha ka snem 1963 la pynlong ïa ka Bye – Election bad la jied ïa u Bah H. Hynñiewta (Shillong), S. D. D. Nichols Roy (Sohra), B. B. Lyngdoh(Nongpoh) bad H. S. Lyngdoh (Nongstoin). Kitei ki Rangbah ha-dien ba la jied MP bad MLA ïa ki, kim shym la lynñiar kthang lane ujor ïa u Paidbah u jied ïa ki. Balei ba u Paidbah u jied ïa ki, ka long namar badon ka daw bad namar ba ki ïeng ha ka nongrim kaba u Paidbah u mon ba kin ieng.
Kumjuh ruh ha ka snem 1967 la jied MP ïa u Prof. G.G.Swell bad MLA ïa u Bah H. Hynñiewta (Shillong), W. Bareh (Jowai), S. D. D. Nichols Roy (Sohra), B. B.Lyngdoh (Nongpoh) bad H. S. Lyngdoh (Nongstoin). Kine ki Rangbah kim shym la lynñiar kthang lane ujor ba u Paidbah u jied ïa ki. Ki jong u Bah H. Hynniewta, E. Bareh, S. D. D. Nichols Roy, B. B. Lyngdoh bad H. S. Lyngdoh kim shym la lynñiar kthang lane ujor, ba nalor ba ki la jop ha ka Election MLA da ki Ticket APHLC, ki la jop ruh ha ka Election MDC da ka Ticket APHLC hi.
Ha ka Ri Synshar Paidbah (ym tang ba ki don hok ban khlei la ka JUBAN – LAK) kitei ki Rangbah ki don hok ruh ban tyrwa ïalade ha khmat u Paidbah ba un jied ïa ki. U Paidbah ruh u don hok ban jied ïa ki bad ha kajuh ka por ym lah ruh ban pynbor ïa u Paidbah ba un klet ïa ka JUBAN – LAK kaba ki la khlei ha ki por shuwa ban jied ïa ki da u Paidbah. Ym lah ruh ban ïaid lait ïa kawei ka jingshisha, ba u Paidbah u la jied ïa kitei ki Rangbah, namar ba ki ïeng ha kata ka nongrim kaba u Paidbah u mon ba kin ïeng. Lada ka la long da kumwei pat te ym lah ban khmih lynti ba kitei ki Rangbah kin jop ha ki Election.
Don ki Ri Synshar Paidbah ha kiba u Paidbah u don hok ban patom noh (recall) ia uno uno u nongmihkhmat uba leh tiri biri lane leh ia kano kano ka kam kaba u Paidbah um sngewdei ba uta u nongmihkhmat un leh. Don kiba ïa kren harum haneng, hangne hangtai ba kito kiba jop ha ki Election MP bad MDC da ka Ticket APHLC, hynrei kiba pdiang ia ka Autonomous State, ki la dei ban shah patom noh (recall) namar ki pdiang ia ka Autonomous State khlem pat da ioh ïa ka jingmynjur jong u Paidbah ym lah ban shu shim ba u Paidbah un mynjur (HALEH U PAIDBAH UM MYNJUR ?) Hynrei ha Ri India ym don ka Aiñ ba lah ban patom noh (recall).
Wat la ym don makna ka Ain ha Ri India ba lah ban patom noh (recall), lada kito ki Rangbah MP bad MDC kiba jop ha ka Election da ka Ticket APHLC) ki kwah eh shaba palat ban pdiang ia ka Autonomous State, ka long kaba shonghok shongblei keiñ ba ki dei ban risaiñ shuwa na ka kam MP bad MDC bad sa ai lad ïa u Paidbah ba un pynpaw da ki KOT THEP VOTE (la ka long lyngba ka Bye – Election lane General Election). Lada u Paidbah da ki KOT THEP VOTE u pynpaw ba u pdiang shisha ïa ka Autonomous State, kata te kitei ki Rangbah ki la lah kein ban ïaid shaphrang bad ban kren shlur ba u Paidbah u mon ïa ka Autonomous State.
Ka Ri India ka dei ka Ri Synshar Paidbah.Ka Dorbar Thaw Aiñ (Constituent Assembly) jong ka Ri India kam shym shim ba u Paidbah jong ka Ri India u dei uba bieit.Dei namarkata ba ka Constituency Assemblu ka la rai ba ka Ri India ka dei ban long ka Ri Synshar Paidbah.
Haba ka Ri India ka dei ka Ri Synshar Paidbah te ym lah keiñ ban khein khyndew thala ïa ka MON jong U PAIDBAH. ñiuma, lah ban sngewthuh ïa ka rukom pyrkhat jong u Paidbah lyngba ki jingthoh kiba mih ha ki kot khubor lane lyngba ki j ingkren ha ki jingïalang paidbah (ym dei ki jingïalang sob sob kiba ym da don ka pyrta ka shula).
Hynrei ïa ka Mon ba shisha jong u Paidbah lah ban iohi shai lyngba ki KOT THEP VOTE. Dei namarkata ïa ki Electiuon la ju pynlong man la ki por, khnang ba u Paidbah na kawei ka por sha kawei pat ka por un ioh lad ban pynpaw ïa la ka Mon.
U John Adams, u President uba ar jong ka America u ong, ba haba ym don Election shuh, te hangta ka jinglong mraw ka la sdang (Where elections end, there slavery begins).
