Khliehriat, Nailar 16
Ka lympung ïalehkai Second Division Football Tournament ba la pynïaid da ka East Jaiñtia Hills District Football Association (EJHDFA) ka la nangjam shaphrang ha ka sngi Balang ha kaba ka Ïapmala UTD SC bad ka Lakadong Umlatdoh SCSC ki la khur ïa ka jingjop ha madan artificial turf kaba ha Diengshynrum.
Ha kane ka jingïakhun, ka Ïapmala UTD SC ka la pynliem noh ïa ka Dienshalalu SC lyngba ka shi kol ba la thep da u Arly Lamo ha ka minit kaba 7.
Ha ka jingïalehkai kaba bud hapdeng ka Ladrymbai Dongwah SC bad ka Tongseng Youth SSC ki la kut ha ka jingïakhaid hadien ba kim shym la lah ban thep kol.
Ka Lakadong Umlatdoh SCSC ka la jop da 3-1 kol ïa ka Pamrakmai SC. Ïa ki kol jong ka Lakadong la thep ar kol da u Kimingson Rymbai ha ka minit kaba 10 & 36 bad ïa kawei pat la pynbud da u Johnsmill Amkhloo ha ka minit kaba 13. Katba ïa ka kol jong ka Pamrakmai la thep da u Junely Siangshai ha ka minit kaba 31.
