Shillong, Nailar 16
Ka jingïai trei shitom ka la pynlong ïa u rangïakura ka Jylla, u Shanborlang Marbaniang ban khur ïa ka jingjop ha ka United Professional Boxing ha ka sien kaba ar.
Ha kane ka rynsanïakura ba la tip kum ka United Professional Boxing kaba la long ha ka 15 tarik u Nailar ha nongbah Delhi kaba dei ruh artad ka sngi rakhe ïa ka jinglaitluid ka ri ne ka Independence Day kaba 77, u Shanbor u la lah ban pynliem ïa u Prasad Katnoor na Maharashtra tang ha ka wat ba-ar lyngba ka knockout.
Une u rangïakura ba dang 24 snem ka rta uba dei u khun ba phra napdeng ki shiphew ngut ki khun jong ka Kong Siplinda Marbaniang, basah ha Pdengshnong, Umlyngka kaba ha Upper Shillong, u la lah ban pyni ïa ka sap ïalehkai naduh kaba sdang kat haduh ba u la lah ban pynliem ïa utei u rangïakura ka liang pyrshah ha ka Super Fly Weight kaba 52kilo.
Kum kaba long mynta kane ka lympung ïakura jong ka Professional Boxing ka dei ka sien kaba saw kaba u Shanbor u la ïoh ban ïashim bynta shabar jylla ha kaba u la jop arsien, kynthup ïa ka jingjop ha ka Marine Pro Boxing Promotion ha u snem 2022 kaba la long ha Mumbai, katba u la ïakhaid ar sien ha ka Professional Boxing kaba la long ha u snem 2022 bad 2023 ha Manipur.
U Shanbor ym lah khlem da pynpaw ka jingsngewkmen halor kane ka jingjop bad u la khmih lynti ba un nang ïai trei shitom khnang ba un lah ban khur jingjop biang ha kiwei pat ki rynsan ïakura ki ban sa long shen.
U Shanbor u la ïai bteng ïa kane ka kam ïakura la 13 snem kynthih bad haduh mynta um shym la kynran dien na kane ka kam ïalehkai namar ka jingangnud ka jong u ka long ban khur ïa ka nam lahduh.
“Nga sngewkmen eh halor kane ka jingjop ha ka sien kaba ar, hynrei ka jingsngewngut ka leit sha U Blei Trai Kynrad uba la don ha syndah jong nga ba khur ïa ka ne ka jingjop, kumjuh ïa i mei iba la ju kyrshan ïa nga bad ka synjuk ïalehkai jong ka Meghalaya Professional Boxing Council (MPBC) kaba la plie lad ïa u lem bad ki nongkyrshan kiba sha lyndet.
