Jowai, Nailar 16
Ka Happiness Phawa bad u Teiboklang Biam ki la long ki nongjop ha ka Independence Day Run 2023 kaba la long ha ka step jong ka sngi Ba-ar ha Jowai.
Ïa kane ka jingïakop mareh la pynlong kum shibynta ban rakhe ïa ka jingdap 77 snem ka jingïoh laitluid ka ri India.
Ïa kane la pynlong da ka shlem treikam u Deputy Commissioner ka West Jaiñtia Hills District ha ryngkat ka shlem u District Sports Officer West Jaiñtia Hills District.
Hashwa ban sdang kane ka jingïamareh la kaweh lama da u Additional Deputy Commissioner u Bah W.R Kharbuli ha ka jingdonlang u Assistant Director ka tnat ïalehkai bad uba long u District Sports Officer u Bah Khroobok Passah, Working President ka WJDSA u EMH Passah bad kiwei.
Kane ka jingmareh ka la sdang na Main Gate jong ka Kiang Nangbah Stadium sha Ladthadlaboh Main Road-Jowai Public School, Gate Polytechnic, Kshaid Rymphum, Salaroh, Dulong Poh-hali Road, Dulong, Pamhadem, Panaliar, Iongpiah, Mission Compound, H.K. Singh School, D.C. Office, New Hill, National Highway, bad pynkut biang ha Kiang Nangbah Indoor Stadium.
Nalor ka Happiness Phawa kaba wan nyngkong na ki kynthei, ka Phyrnai Kyndait na Mukhaïalong bad ka Monlangki Kyndait na Mihmyntdu ki la wan ha ka kyrdan ba-ar bad balai. Katba ha ka liang ki shynrang ïa ka kyrdan ba-ar bad ba lai la ïoh da u Dasaman Kyndait na Sabahmuswang bad u Santify Pale na Nartiang.
