Jowai, Nailar 16
Ka Mulang Ïalong ka la rah ïa ka nam lahduh ha ka Independence Day Cup Under-17 Football Tournament kaba pynïaid da ka West Jaiñtia District Sports Association (WJDSA), hadien ba ka lah ban pynliem noh ïa ka Dulong da 3-2 kol ha ka jingïakhun final kaba la long ha ka sngi Ba-ar ha Kiang Nangbah Stadium kaba ha Jowai.
Ïa kane ka lympung la pynlong ryngkat ka jingïatreilang lam bad ka shlem ai jinghikai jong u Deputy Commissioner, West Jaiñtia Hills District bad u District Sports Officer na ka bynta ban ïasnoh kti lang ha ka ban rakhe ïa ka jinglaitluid ka ri India kaba 77.
Ka Mulang Ïalong ha kane ka jingïakhun ka la ïoh ban pynkhih jar tang hapoh 5 minit lyngba u Samith Pale. Hadien kane, ka Dulong ka la ïakhun tyngeh bad kyngba ka jingpynshongshit ki nongwan peitkai ka la ïoh ban pynphai kylla ar kol ha ka minit kaba 24’ bad 26’ lyngba u Kynsaikupar Bareh bad Yoobhalang Langstang.
Ka Mulang Ïalong haba la poi ha ka kylla miet ka la sei ïa ki buit ki bor ban ïakhun bad ka la ïoh thep sa shi kol lyngba u Charelang Mulieh ha ka minit kaba 35’. Da kane ka jingïakhaid, ka Mulang Ïalong ka la lah ban kyntiew ïa ka rukom ïalehkai jong ka, bad ka la ñiom ïa ka kut ïalehkai jong ka Dulong bad dei ha ka minit kaba 64’ ka la ïoh ban pyntam sa shi kol lyngba u Nidaroi Mulieh kaba la biang pura ban khur syndon ïa ka namjop.
Ïa ka nam Man of the Match bad ka Player of the Tournament la ïoh da u Nidaroi Mulieh jong ka Mulang Ïalong, ka Best Goal Keeper ka leit sha u Seibor Rymbai jong ka Mulang Ïalong bad ïa ka nam rangthep kol ba kynsai ne Top Scorer ka leit sha u Riphi O Shylla jong ka 7Wasa FC, uba la thep 6 kol ha kane ka lympung.
Ïa ki khusnam sha kitei ki kynhun la sam da u MLA ka Jowai u Bah Wailadmiki Shylla ha ka jingïadonlang u Deputy Commissioner, WJH, Bah B.S Sohliya, ki nongkitkam bad dkhot ka WJDSA, u DSO u Bah Khroobok Passah bad kiwei kiwei.
Ha kane ka juh ka sngi la pynkup burom ïa ki rangïalehkai Under-14, ka RC Evening School Mihmyntdu (ka lahduh jong u snem 2022), ka HK Singh Memorial Secondary School kan mihkhmat ïa ka Jylla sha ka International Subroto Mukherjee Cup ha Bengaluru mynta u snem.
La pynkup burom ruh ïa u Alexader Lyngdoh u nongïakhun kti, u Givenson Suting u khynnah ka North Liberty Higher Secondary School uba la shah jied ha ka Bengaluru FC Football Academy lyngba ka Grassroot Player Advance Centre, ki nongïalehkai Athletic ka West Jaiñtia Hills kiba la ïoh khur ïa ka Over All Champion na ka State Level Athletic Meet.
