Shillong, Nailar 16
Ka Shillong Sports Association (SSA) ka la rai ban pynsangeh shwa ïa ka lympung ïalehkai 4th Division (U-20) Football League naduh mynta ka sngi Ba-ar (17 tarik).
Kane ka rai kaba la wan lyngba u Assistant General Secretary u Bah D.L. Nongbri u la ong ka dei na ka daw ba ka don ka jingkilanmet (trial practice training session) na ka bynta ki kynhun ïalehkai jong ki khynnah.
Kine ki lympung ïalehkai ki kynthup ïa ka Hero Junior Boys’ National Football Championship na ka bynta ka Dr B.C Roy Trophy 2023-24 (Tier-1) ka ban long ha Bhubaneswar, Odisha naduh 5 haduh 15 tarik u Nailur mynta u snem, kumjuh ka Sub-Junior Boys’ National Football Championship 2023-24 (Tier-1) ka ban long ha Malda & Berhampore, West Bengal naduh 3 haduh 13 tarik u Nailur mynta u snem bad ka Hero Sub-Junior Girls’ National Football Championship 2023-24 (Tier 1) ka ban sdang naduh 3 haduh 13 tarik u Nailur mynta u snem ha Amritsar, Punjab.
Ha ka Dr B.C Roy Trophy, ka Meghalaya ka la don ha ka Group-B ha kaba kan ïakhun pyrshah ïa ka Kerala, West Bengal bad ka Jammu & Kashmir. Ha ka Sub-Junior Boys’ National Football Championship, ka Meghalaya kaba don ha ka Group-A ha kaba kan ïakhun pyrshah ïa ka Karnataka, SAI bad ka Uttar Pradesh. Katba ha ka Sub-Junior Girls’ National Football Championship, ka Meghalaya ka la don ha ka Group-C ha kaba ïa aireng pyrshah ïa ka Gujarat, Assam bad ka Chhattisgarh.
Te kumta ïa ka lympung 4th Division U-20 Football League la hap ban pynsangeh shwa na ka daw ka jingbym don madan ïalehkai.
