Shah ktah la jan 46,000 ngut na ka jingshlei um ha Assam

Guwahati, Nailar:

Ka jinglong jingman ha kaba ïadei bad ka jingshlei um ha Assam kumba ka long ha ka sngi Ba-ar ka la sdang ban duna wat lada ki la jan don kumba 46,000 ngut ki briew kiba dang shah ktah jur ha ki san tylli ki distrik, la ïathuh ka tyllong khubor.

Katkum ka jingïoh jingtip na ka kaiphot jong ka Assam State Disaster Management Authority (ASDMA), la ong ba ki la don palat 45,700 ngut ki briew kiba la shah ktah jur na ka jingshlei um ha Chirang, Darrang, Dhemaji, Dibrugarh bad Sivasagar distrik.

Ka Sivasagar ka la long ka distrik kaba la kham shah ktah jur ha kaba ki la jan don kumba 23,000 ngut ki briew kiba la shah ktah jur ha kaba la bud da ka Dhemaji (20,500) bad ka Chirang (1,500), ka la bynrap.

Haduh ka lah sngi U Blei ki la don palat 65,500 ngut ki briew kiba la shah ktah jur na ka jingshlei um ha ki 7 tylli ki distrik.

Naba ym shym la ïoh khubor shuh ban dang don ki briew kiba dang ïap ha ka jylla, ka jingdon jong kiba la ïap na ka daw jong ka jingshlei um ka la neh 14 ngut.

Ki bor sorkar ki la pyntreikam ïa san tylli ki jaka sah ba shipor na ka bynta ki lanot ha Sivasagar distrik, ha kaba 1,219 ngut ki briew ki la pynlong jaka sah bad pyntreikam ruh ïa saw tylli ki ïing na ka bynta ban sam ïa ki jingdonkam ha ki ar tylli ki distrik.

Kumba ka long mynta la ong ba ki la don kumba 247 tylli ki shnong kiba dang ngat hapdeng ka jingshlei um bad kumba 5,743.09 hectares ki jaka rep ki la shah pynjulor, la ong ka ASDMA.

Kiba bun na ki jingker, ki jingtei, ki surok, ki jingkieng bad ki ïing ki la shah pynjulor na ka jingshlei um ha Charaideo bad Sivasagar.