Raphael Warjri
Ka synropktien ka dei kaba wandur na ki ktien ba bynrap ryngkhi kawei hadien kawei ha kata ka rukom ba kiba pule ne shahshkor kin sngewthuh ïa ka jingmut jong ka ang ha ka synropktien. Ki ktien ha ka synropktien ki long kiba synlar bad teng teng lah ban don ki kyntien khia thew ki ba ym lah ban sngewthuh salonsar ki paidbah. Ha ka synropktien, nalor ki ktien synlar ne khiathew, ki don ruh ki kynhun kyntien kiba pynshoh bad shnok katkum ka jingmut ka ba kdew ïa kano kano ka phang. Ki ktien ha ka synropktien ki kit jingmut ha la marwei ha la ka ktien shimet bad ka wan ka ktien kren haba synrop lang ha manla ka ang jong ka synropktien.Nalor kata ki don pat ki syrdoh ktien kiba arkyntien ne palat kiba lah ban byrshem lang ha ka synropktien ka ban kham khia jingmut. Kum kita ki ktien lah ban jer noh da ki Tiensyrdoh kaba kit jingmut ha ka ktien phareng ‘Phrase’ bad Tienwet ha ka ktien phareng ‘Idiom’. ka Tiensyrdoh dei ki ktien ba la syrdoh lang ban kit jingmut bakhiathew bad ka Tienwet dei ki ktien ba la wet katkum ka rukom kren ktien kmie tynrai ha ka imlang sahlang, khamtang kum ha lympung jong ki riew shemphang. Kum ka nuksa ‘Ha ba la jur ka iashun ki arliang mamla, la jynjar ba iasuk’- hangne ‘…jur ka iashun…’ ka dei ka tiensyrdoh; hynrei lada thoh ‘La jynjar ban ïasuk, haba ïashun thlongmluh thlongsying ki arliang mamla- hangne’…thlongmluh thlongsying…’ ka dei ka tienwet. Kawei pat ka nuksa, ‘La paw tyngkreiñ, ki kam arsap’ bad ‘La paw pen ryngkew ki kam arsap’- hangne paw tyngkreiñ dei ka tiensyrdoh bad pen ryngkew dei ka tienwet. Byllai ki nuksa ba lah ban jer, hynrei la tyrwa ai jingmut ba ki paid nongpule kin pdiang ne kyntait ryngkat ka kubur na ki iktiar jong ka sorkar ne jong ki shlem ka thoh ka tar Khasi.
Kawei pat ka bynta jong ka bynta jong ka jingkren dei ka long shynrang long kynthei jong ki jynthaw ba la tip ha ka ktien phareng ‘Gender’ ha ka ba lah ban jer ha ka ktien Khasi, ‘Kongbah’ namar ba ka kynthup ia ka ktien Kong kaba thew ïa ki kynthei bad Bah kaba thew ïa ki kynthei, Kongbah lane Bahkong la ju pyndonkam ban sin ïa ki kynthei ba leh shynrang lane ïa ki shynrang ba leh kynthei kaba long kyllum ha ka imlang sahlang. Kumta haba ong ‘Male Gender’ ha ka ktien Khasi kan dei Kongbah Shynrang, ‘Female Gender’ – Kongbah Kynthei, Common Gender’ – Kongbah Kyllum, bad ‘Nueter Gender’ – Kongbah Mar. Ha ba bishar ïa ka ktien Khasi bad ki bynta jingkren la ha kaba kren kyllum ne ha ka ba thoh ba tar ba pule puthi, lehse ka Kongbah Mar kan ym don namar ba ha ka pyrkhat Khasi la jer ïa baroh ki mar ruh da ka tiennam tienjer, nuksa ‘u khiew’, ‘ka pliang’, ‘ka wait’, ‘ka tari’, ‘u lyngka’, ‘u mohkhiew’, ‘u rishot, u rijied’, ‘ka kynroh’, ‘ka tnum’, ‘ka sad’, wat ïa ki tiar jong ka juk mynta ruh kum ‘ka miej’ ‘ka shuki’, ‘ka kurat’, ‘u tyrnem’, ‘ka rynda’ ‘ka pyrda’, bad kumta ter ter. Kane ka rukom nam rukom jer ka dei kaba don nongrim katkum ka rukom pyrkhat kaba dei ïa ki mar ruh kum ki jynthaw ba la ban pynkap kynthei ne shynrang katkum ba long ne ba pyndonkam. Lah ban kdew kum ïa ki bynta jong kino kino ki mar, lada shim shwa ïa ka ïing- don ki snap shynrang kum ia u mawkhrum, u rishot, u rijied, u khnong, u tympan, u shawkad, bad kiwei kiwei, hynrei don ki bynta ba pynkap kynthei kum ïa ka dwar, ka khyrnit, ka dpei, ka tyngyier, ka syrdeng, ka pongshai, ka sad, ka tnum, bad kiwei kiwei katkum ka jinglong bad jingpyndonkam.
Haba jer ba nam ïa ka mariang ruh- sdang shwa na ka meiramew ne ka khyndew, ka khlaw, ka sañium, ka lyngkha, ka pyntha, ka pynthor, ka madan madiah, u shyiap, u maw, u dieng, u sla, u soh, u syntiew, u jyntang, u thied, u tynrai, bad kiwei kiwei. Hynrei don ki bynta ba don ka nongrim ha ba jer u ne ka ia kino kino ki tiar ne ki mar kiba don ki khep ba jer kumta katkum ka jinglong bad rukom pyndonkam. Kum ka nuksa ïa kaba don ha ka mariang la ong ka khyndew- kynthei, hynrei haba shim shikham ha kti la jer u khyndew, kumjuh ruh ki jynthung ba dang snoh ha ka mariang la jer u dieng, u sla, hynrei haba la pom ia uta u dieng u ba la dep khrai la jer ka dieng, kumjuh ruh haba dang snoh ha dieng la jer u sla, ynda la kheit ha kti la jer ka sla.
Hynrei u soh, u syntiew ki neh kumjuh lada ha dieng ne ynda la dep kheit ruh. Ha ba khmih ïa ki metbneng ruh kumjuh – ka bneng, ka sahit, ka suiñ, ka sngi kiba long kynthei, hynrei kiba long shynrang kum u lyoh, u slap, u pyrthat bad kumta ter ter. Ki don sa kiwei ki bynta ba dei lang kynthei ne shynrang tangba ym lah ban kdew ïa ka daw kum ia u shang la jer ruh ka shang- ba ym lah ban pynpher ba ha kano ka bynta ban ong u shang bad kano ka bynta ban ong ka shang, kumjuh u kriah ka kriah. Kat ba lah ban bishar ka long ba kiei kiei ki ba kdup bad ki ba kham duna bor kumba long hi ki briew ha ka imlang sahlang Khasi la ñiew Kynthei, bad ïa kino kino ki ba shitylli bad ïeng skhem la ñiew Shynrang- kum ïa u rishot bad ka tnum, u dieng ba dang thung bad ka dieng ba lah pom lah khet, u khyndew ha sla kti bad ka khyndew ha mariang, ka khyndew ka shyiap ha mariang bad u shyiap ba la lum thup. Lehse ka donkam ka rukom pynshongñia kaba kham skhem bad sani ha kane ka liang ban sngewthuh shai ha la ka ktien Khasi tynrai.
