Imphal, Nailar:
Ka sorkar Manipur mynta ka dang ïakhun ïa ka por ban pyndep ïa ka bynta kaba nyngkong na ka bynta ban pyndep ïa ki ïing ban ai jaka sah sha ki 3,000 tylli ki longïing kiba la phet shnong na ki jaka ba la jia ki jingïakynad bad ka jingïaumsnam khnang ba kin ïoh ban mih na ki jaka sah shipor. Kiba bun na kito kiba la shah ktah jur ki la ïoh jaka sah ba shipor ba la pynkhreh na ka bynta jong ki na ka bynta lai bnai.
U Superintending Engineer u P Brojendro of Manipur Police Housing Corporation Limited, uba la shimti ban pyntrei ïa kane ka Project, ha ka jingïakren bad ki nongthoh khubor u la ong, “Ka jingshna ïa ki ïing ka la sdang ha ka 26 tarik, Jylliew shaneng ha ki san tylli ki jaka bad ngi la ïakhun bad pynsted ban lah ban pyndep kumba la thmu kham kloi katba lah.”
Kumba la ïathuh, la ong ba ki la don kumba 200 tylli ki ïing ba la shna hajan Sajiwa Jail ha Imphal East district kiba la jan dep, la ïathuh ki heh sorkar ha kaba la ong ba kawei pa kawei ka ïing kin don ar kamra bad ka jaka leit bar bad kin sa don ruh kawei ka jaka shet na ka bynta baroh, katba 10 tylli ki ïing kin sa ïasohlang. Ki la don kumba 160 ngut ki nongtrei kiba la trei na ka bynta ban pyndep ïa ki ïing, ka jingbuh por ban pyndep ïa kine ki ïing ka long haduh ka 20 tarik, Nailar.
