Khliehriat, Nailar 17
Ka Khliehmyntriang SC ka la rung sha kawat ba-ar jong ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA). Kane ka wan urlong hadien ba ka lah ban pynliem noh ïa ka Moopynïein SWO da 5-1 kol ha ka Sngi Palei ha madan Artificial Turf Diengshynrum kaba ha East Jaiñtia Hills District.
Ha kane ka jingïakhun ka Khliehmyntriang ka la lah ban ïalehkai bha naduh da kaba ïoh ban pynkhih jar nyngkong eh lyngba u Juk Dkhar ha ka minit kaba 4.
Hashwa ban jam sha ki shiteng kynta jong ka jingïalehkai, ka Khliehmyntriang ka la ïoh ban pynbud biang sa ar kol lyngba u Deposit Dkhar ha ka minit kaba 23 bad u Arun Dkhar (26) na ka bynta ban tam 3 kol ha ka kylla step.
Hadien katto-katne por ba la bteng biang ïa ka jingïakhun jong ka kylla miet, ka Moopyniein SWO ka la ïoh pynphai kylla shi kol lyngba u Bamon Myrchiang ha ka minit kaba 48.
Ka Khliehmyntriang ka la thep biang sa ar kol lyngba u Raplangki Lyngdoh ha ka minit kaba 64 & 76 na ka bynta ban khur syndon ïa ka jingjop.
Ha ka jingïakhun kaba bud, ka Bataw FC ka la jop da ka ‘walkover’ hadien ba ka kynhun ïalehkai jong ka Umstaiñ SC kim shym la wan mih sha madan.
Haba phai sha ka jingïalehkai kaba khatduh ha kane ka sngi hapdeng ka Ratacherra SC bad ka Umrasiang UTD SC, ki la ïasam mar shi point hadien ba ïakhaid mar 1-1 kol. Na ka liang ka Ratacherra SC la thep da u Heibormi Pohshna ha ka minit kaba 36, hynrei ka Umrasiang UTD ka la lah ban pynphai kylla lyngba u Ten Muksor ha ka minit kaba 53.
