Ka jingshim ïa ka kyrdan kpa bad kmie ha kane ka juk ban sharai bad ban pynheh pynsan ïa la ki khun, kam dei satia ka kam kaba suk. Ki la don bun palat ki jingeh, jingtynjuh, jingpynshoi, jingkhwan ïa ki khun, khamtam ïa ki samla, kaba buh jingeh ïa ki kpa ki kmie kumno ban pynthikna ba ki khun jong ki, ki ïaid ha ka lynti jong ka jingbha bad jingsuk. Ngin shim ïa ka nuksa jong ka jingïoh kem ki pulit ïa ki nongïalam bad ki dkhot ka kynhun lehnoh thymmai ïa kaba la ai kyrteng “National Liberation Council of Nongkyndong (NLCN)” ha kaba ki pulit ki la kam ba u nongïalam lane u “Chairman” kane ka kynhun u dei u khynnah uba dang pule ïa ka Klas 10! U khynnah uba dang pule Klas X ngi sngewthuh ba u dang don hapdeng ka jingsumar sukher ki kmie ki kpa jong u, bad yn ym don ki ban poi pyrkhat ba un dei uta u “Chairman” ka kynhun lehnoh. Ha kajuh ka rukom, kiba bun na kiba la shah kem namar ka jinglong dkhot ka NLCN ki dei ki samla.
Sa kawei pat ka jingeh ka dei ka jingjyllei jong u drok ha kaba ngi ju kyndit haba ïohi ne ïohsngew ïa ka jingshah kem jong ki samla halor ka jingkynnoh ba ki donkti ha ka kam khaïi drok. Ki don ruh ki khep ba wat ki kmie ki kpa kim don jingtip satia ba ki khun ki donkti ha kine ki jait kam, bad ki sa tip ynda ki pulit ki wan khynra ha ïing ha sem ban kem ïa ki khun jong ki. Kiba la mad ïa kiba kum kine ki sngew ba ka bneng bad ka khyndew ki la ïakynduh lang bad ka don sa tang ka jingdum kaba ker sawdong ïa ka jingim jong ki. Ka dei ka jingmad kaba kthang bad kaba pynkhia bad pynsohsat ïa ka jingmut jingpyrkhat. Hynrei namar ba ki dei ki khun ki kti lajong, ki kmie ki kpa kim banse ban wad lad wad lynti kumno ban ïoh pyllait ïa ki na along. Ym don satia ki kmie ki kpa kiba kwah ban ïohi ïa la ki jong ki khun ba kin shong ha ki along da ki phew bnai bad snem. Kin ïaleh shitom beit ban pyllait jamin ïa ki.
Ka jingkharoi ki jingsniew kiba bun rukom ki buh jingeh ïa ki kmie ki kpa. Jan baroh ki kmie ki kpa ki pyni ïa ki nuksa kiba bha ïa la ki jong ki khun khnang ba kin kiar na ki jingsniew kiba ap thap. Hynrei ki don pat ki khep ba ki khun ki kti ki shah pynngop ne shah pynshoi ban leh ïa ki kam be-aiñ kiba bun rukom bad ki ban wanrah pat ïa ka jingsohsat hadien habud. Ki khun ki kti ki dei ban sngewthuh ruh ïa la ka jong ka kamram kumba ki kmie ki kpa ki sngewthuh ïa kaei kaba ki dei ban leh na ka bynta ki khun. Lada ki khun samla jong ngi kim long kiba kitkhlieh ïalade, kumno kin lah ban kit ka lyngkor ïa la ka ïing ka sem, ka shnong ka thaw, ka kur ka jait, ka imlang-sahlang bad ka jaitbynriew? Lada ngi ïoh pat da ki khun kiba tip ïa ka jingïapher hapdeng ka jingbha bad jingsniew, kiba kiar na ki jingshah pynshoi ban leh ïa ki kam sniew, ngin sa ïohi ba ka lawei kan long kaba bha na ka bynta ïa baroh.
Ban ïakhun ïa kine ki jingsniew jong ka pyrthei, ka dei ban don ka jingïatreilang naduh na ïing na sem hapdeng ka kmie, u kpa bad ki khun ki kti bad nangta sa ha shnong ha thaw, ha ka kur ka jait bad ha ki shlem pule kum ki skul, kolej bad skulbah. Ki kmie ki kpa ki dei ban pynlut por bad la ki khun, bad ha kajuh ka rukom, ki khun ki dei ban don ka por na ka bynta ki kmie ki kpa bad ki hynmen ki para. Ka dei ban don ka jingïasyllok bad ka jingïakren ïa khana ha la ïing la sem halor ki mat ki jura ki bapher bapher jong kane ka juk. Ki kmie ki kpa kim dei ban khang ïa ki khun haba ki pynpaw ïa kaei-kaei bad ha kajuh ka rukom, ki khun kim dei ban tieng ban kren ne pynpaw ïa ka jingsngew ha la ki kmie ki kpa. Ka jingïadei ka dei ban long kaba jan bha khnang ba lada kano-kano, ki khun kin lah ban wan ïathuh beit ha la ki jong ki kmie ki kpa, khlem da donkam ban da ka tip shwa ka pyrthei baroh kawei.
Namarkata, ngim dei ban klet ïa la ka jong ka deiti kum ki kmie ki kpa bad ki khun ki kti. Ka ïing kaba skhem bad kaba khlaiñ ka long ka jingkyrkhu kaba khraw ha ki liang baroh. Bad ngin ïoh ïa ka jaitbynriew, jylla bad ka Ri kaba khlaiñ lada ngi lah ban pynkhlaiñ shwa na la ki jong ki ïing ki sem. Ki kmie ki kpa bad ki khun ki kti ki dei ban long kiba husiar bad kiba peitngor khamtam ha ka jingjied ïa ki paralok. Bunsien ngi ngop namar ki paralok da ka jingsngewthuh bakla ba kaei kaba leh ki paralok ka dei kaba bha suda. Ngi hap ban long shisha kita kiba “sian kum ki bseiñ bad kiba jemnud kum ki paro” lada ngi kwah ban ym shah pynngop ne shah ïalam bakla ha kane ka pyrthei shong basa. Ngi dei ban long ki atiar jong ka jingsuk bad ka jingbha ha baroh ki liang.
