Jowai, Nailar 17
Ka Pateinki Sabah, Moodop Royal, Madan kynsaw Mawkyndeng bad ka Da-i-hi Mynsngat ki la buh jaka ïalade sha ka quarter final ha ka lympung ïaleh -kai 3rd Division Football Tournament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ki la khur jingjop ha ka pre-quarter final kaba la long ha madan Kiang Nangbah Stadium Ladthadlaboh, Jowai ha ka sngi Balang.
Ha ka jingïakhun kaba nyngkong, ka Pateinki Sabah ka la pynliem noh ïa ka Lumkhangdong Kyndongtuber lyngba ka shi kol ba la thep da u Shngaiñ Shylla ha ka minit kaba 52.
Ha ka jingïakhun kaba bud, ka Moodop Royal ka la pynliem noh ïa ka Mulang Ïalong lyngba ka tie-breaker da 6-5 kol hadien ba kim shym la lah ban pynkhih jar haduh kaba kut ka jingïakhun.
Ha kawei pat ka jingïakhun, ka Madankynsaw Mawkyndeng ka la pynjem khnap ïa ka Myrjai da 7-2 kol bad u Dangri Phawa u la khur ïa ka hat-trick.
Ha kane kane ka jingïakhun, u Dangri u la thep ha ka minit kaba 23, 50 & 60, kiwei pat ki nongthep kol ki long u Albert Sariang u la thep ar kol ha ka minit 37 & 79, katba ïa ki shi kol la thep da u Fernando Sayoo ha ka minit kaba 40+2 bad u Philemon Lamare ha ka minit kaba 65. Ïa ki ar kol jong ka Myrjai la thep da u Treilang Kyndait ha ka minit kaba 12 bad u Jumonki Phawa ha ka minit kaba 58.
Haba sha kawei pat ka jingïakhun kaba khatduh, ka Da -i-hi Mynsngat ka la pynliem noh ïa ka Iooksi Youth Welfare da 3-2 lyngba ka tie-breaker hadien ba ki la ïakhaid mar 2-2 kol haduh kaba kut ka jinïalehkai.
Ïa ki kol jong ka Da-i-hi Mynsngat la thep da u Repilda Muksor ha ka minit kaba 9 bad u Pynskhem Mukhim haka minit kaba 22, katba ki kol jong ka Iooksi Youth Welfare la thep da u Pyrshang Tangliang ha ka minit kaba 34 bad u Khatarbor Suchiang haka minit kaba 41.
Na ka liang ki bor pynïaid ki la pynbna ba ka jingïakhun quarter final yn pynlong ha ka sngi 18 tarik bad 19 tarik.
Ka jingïakhun quarter final ha ka 18 tarik kan long hapdeng ka Madan Thadmuthlong pyrshah ïa ka Moo-kyrdup ha ka por 2 baje janmiet. Katba ha ka 19 tarik yn pynlong haduh lai tylli ki jingïakhun, kita ka Mukhla Umlang-chor pyrshah ïa ka Newhill ha ka por 11 baje mynstep, ka Pateinki Sabah ïa ka Moodop Royal ha ka por 1 baje nohphai sngi bad ka Madan Kynsaw Mawkyn-deng ïa ka Da-i-hi Mynsngat ha ka por 3 baje janmiet.
