Shillong Nailar 17
U kapten ka Argentina, kaba la rah ïa ka nam lahduh ha ka FIFA World Cup u Lionel Messi uba la mih noh na Europe ban leit ïalehkai bad ka Inter Miami, un ïaknieh lem bad ar ngut ki khlur ïalehkai ka Manchester City u Kevin De Bruyne bad u Erling Haaland na ka bynta ka khusnam kum ki rangïalehkai ba kynsai ha ka UEFA jong ka aïom ba la dep.
Utei u khlur ïalehkai ka Argentina u la ïohpdiang ar sien ha ki 12 snem mynba u dang don ha Barcelona kaba la rah ïa ka nam lahduh ha Europe. Katba ka Man City ka la khur ïa ka nam lahduh ha ka UEFA Champions League ha ka aïom ba la dep.
U Pep Guardiola uba la lah ban pynurlong kum u coach ïa ka Man City ban rah ïa ka Champions League, Premier League bad FA Cup u don jingkyrmen ban ïohpdiang ïa ka khusnam hadien ba u la paw kyrteng hapoh ka thup ryngkat u Simone Inzaghi jong ka Inter Milan, uba la lah ban pynurlong ïa ka Inter Milan ban jam sha ka final ha ka Champions League bad u Luciano Spalletti, uba la lah ban pynurlong ïa ka Napoli ban rah nam lahduh ha ka Serie A.
Ïa ki kyrteng jong ki nongjop yn sa pynbna ha ka sngi ban pynïakap ïa ka Champions League ka ban long ha ka 31 tarik mynta u bnai ha Monaco.
Katba ïa ki kyrteng jong ki ’thei ïalehkai lem bad ki coach ki ban don hapoh ka thup yn sa pynbna ha ka taïew ka ban wan hadien ba la kut ka FIFA Women’s World Cup, la ong ka UEFA.
Ka England kan ïaknieh ïa ka nam lahduh pyrshah ïa ka Spain ha ka Sngi U Blei ha ka final ka ban long ha Australia.
