Shillong Nailar 17
Ka jinglah ban sei ïa bun bah ki nongïalehkai phutbol na ki shnong bapher bapher na nongkyndong kam shym la lah ban ai jinghun ïa kiba bun ki nongpynïaid klob namar ka Sorkar kam shym la ïohi jngai na ka bynta ban pynïoh ïa ki jaka ïalehkai kiba biang ha nongkyndong.
Ym lah ban len ba ka Jylla ka la lah ban sei ïa bun bah ki nongïalehkai phutbol kiba na nongkyndong ha kaba ki la long kiba paw ym tang ha ka Jylla, hynrei wat shabar ruh kynjuh. Pynban lada phai sha ki jaka ïalehkai ha nongkyndong katno ka long kaba isangsot ban peit namar ki la shah ïeh beiñ ha ki bor Sorkar.
Kiba bun ki jaka ïalehkai ha nongkyndong ki shu don tang ka madan ïalehkai kaba la shu pynwandur hi tang kat ban ïoh ïalehkai, hynrei haba phai sha ki jaka shong ki nongpeitkai, ki jaka khreh ki nongïalehkai ym shym la don bad lada ki sports club haba ki pynlong ïa ki lympung ïalehkai kiba heh ki hap ban pynlut spah ha ka ban shna ïa ki jaka shong da ki siej bad ki lyntang khnang ban kham pynsuk ïa ki nongpeitkai.
Halor kane ka jingbym don ïa ki jaka ïalehkai kiba biang, u Bah Philander S. Thongni, General Secretary ka Umsawrang Sports Club & Youth Welfare Organisation, kaba long ka klob kaba la kham paw khmat na ki thaiñ Bordar Balat kaba ju pynïaid ïa ki jingïalehkai phutbol man la u snem, u la kren bynñiaw halor ka jingshah ieh beiñ ki Sports Club na nongkyndong ha ki bor Sorkar.
“Haba peit ïa ki nongïalehkai ha ki jingïalehkai bapher bapher, kiba bun ki dei kiba la mih na nongkyndong, hynrei haba phai sha ka jingdon ïa ki jaka ïalehkai, kynthup ïa ki VIP Gallery ki long kiba jot rathai namar bym don ki lad jingïarap na ki bor Sorkar.”
Na ka liang ki nongïalam ka Umsawrang SC&YWO na ka por sha ka por ki la leit ud bad kyrpad sha ki bor Sorkar naduh ka por ka jingsynshar ka seng Congress bad haduh mynta ba la ïalam da ka Sorkar MDA-II, ym shym la ïohi dak eiei ruh ban ïoh ki jingïarap
Namar kata, sa shisien pat ka la buh ka jingkyrpad na kane ka Sorkar kaba mynta ba kan ai jingïarap lem ïa ki Sports Club kiba na nongkyndong, khamtam ban maramot ïa ki madan ïalehkai bad ïa ki jaka shong ki nongpeitkai khnang ban lah pynïaid ïa ki lympung ïalehkai ha ka rukom kaba biang.
