Shillong Nailar 17
Ka All Meghalaya Karate Do Association (AMKA) ka la sdang ïa ka lympung ïalehkai 29th Inter School and 11th Inter College Karate Tournament 2023 ha ka Sngi Palei ha Multi Purpose Indoor Stadium jong ka Sports Authority of India (STC) Training Centre kaba ha NEHU.
Ha kane lympung ïalehkai ka ban neh lai sngi kynthih la wan ïashim bynta da palat 500 ngut ki khynnah, kiba kynthup ïa hynñiew tylli ki kolej bad 80 tylli ki skul. Lada ïanujor bad u snem ba la dep, ka jingkiew ki nongwan ïashim bynta ka long da kumba lai spah tam ki khynnah.
Ïa kane ka lympung la wan ban plie da u Myntri ka tnat ïalehkai ka Sorkar Jylla u Bah Shakliar Warjri kum u kongsan ha ka jingïadon lang ruh u Working President ka Meghalaya State Olympic Association u Bah John F. Kharshiing ryngkat ki kmie ki kpa jong ki khynnah bad ki nonghikai jong ki skul bad kolej.
Kum ban shu bynrap ba ha u snem ba la dep ka skul ba la ïoh ban rah ïa ka nam lahduh ka dei ka OM Roy Memorial Secondary School ha ka liang ki kynthei bad ha ka liang ki shynrang la rah da ka St Anthony’s LP School, katba ha ka liang ki kolej, ka kynhun ba la rah ïa ka nam lahduh ka dei ka Shillong College.
Ka jingthmu jong ka AMKA haba pynlong ïa kane ka lympung kaba lai sngi man la u snem ka long ban plie lad plie lynti ïa ki ’rang bad ’thei ïalehkai karate kiba dangrit jong ka Jylla, ba kin pynpaw ïa la ki jong ki sap ïalehkai kaba ki don ha ka Kumite bad Kata.
Lyngba kane ka lympung ïalehkai, ka AMKA ka la ïoh ban sei ïa ki sap ba nylla bad bteng ban btin lynti pat ïa ki ban saiñ dur janai shuh shuh ïa ka kam ïalehkai tat haduh ba kin da kynjoh sha ka thong. Kan plie ruh ïa ka lad ban mihkhmat ïa ka Jylla ha kiba bun ki lympung ïalehkai hapoh ka ri bad wat shabar ri ruh kynjuh.
