Khliehriat, Nailar 18
U Firstson Pohlong u la khur ïa hat-trick bad ban pynlong ïa ka TSC Lummyrli ba kan khur ïa ka nam jop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka TSC Lummyrli ka la pynliem noh da 3-1 kol ïa ka Lumshnong SC ha ka jingïakhun kaba la long ha madan Artificial Turf Diengshyn-rum, East Jaiñtia Hills District ha ka sngi Thohdieng.
Ïa kine ki lai kol jong ka TSC Lummyrli la thep da u Firstson Pohlong ha ka minit 28, 51 & 76. Katba ïa ka shi kol jong ka Lumshnong SC la thep da u Daeimitre Ladong haka minit kaba 69.
Ha ka jingïakhun kaba bud, ka Mutong Youth SC ka la jop da 3-1 kol ïa ka Kwator Senglang SC.
Ïa ki kol jong ka Mutong la thep da u Hamkle Dkhar ha ka minit kaba 14, u Fourman Shylla uba la bakla thep ha ka minit kaba 44, bad u Josling Dkhar haka minit kaba 72. Katba ïa ka shi kol jong ka Kwator SC la thep da u Heptarcy Rupsi ha ka minit kaba 2.
Te kumta ka TSC Lummyrli bad Mutong Youth SSC ki la rung sha ka jingïakhun jong ka wat ba ar.
Ka Evergreen Lad Wahwapung ka la pynliem noh ïa ka Umrasongda 2-0 kol bad ka Umrasong ka jop lyngba ka tie-breaker (5-4 kol) ia ka Umrasong SC hadien ba ki la iakhiad mar 2-20 kol.
Ïa ki ar kol jong ka Evergreen Lad Wahwapung la thep da u Erick Paslein ha ka minit kaba 16 bad u Dr. Sanky Shangpung ha ka minit kaba 59.
