Bogota, Nailar:
U jumai uba jur u la pynkhynñiuh ia ka nongbah Bogota jong ka Colombia ha ka Sngi Palei, ha kaba ki ‘Siren’ ba la buh ban ai jingmaham ha ki por ba ap jingma, ki la sawa bad ai dak ia ki briew ba kin phikir ialade. Ha kane ka jingjia kawei ka briew ka la khlad noh hadien ba ka kynthih ruma nalor ka ïing mala.
Wat la katta, la ong ba ym shym la ioh khubor ban don ki jingjulor ne kino-kino ki jingjia na katei ka jingwan jong utei u jumai ha katei ka sngi lait noh sa tang ia katto katne ki jingjia ki bym da ktah jur, kum ka jing sahkut jong ki briew hapoh ka lift ‘Elevator’ bad kumjuh ruh kiwei kiwei ki jingjia kiba malu- mala.
Ka tnat Colombian Geological Survey (CGS) ka la pyntip ba utei u jumai uba la khynñiuh ha katei ka sngi u don ha ka jingthew kumba 6.1 Magnitude, katba na ka liang ka United States Geological Survey (USGS) ka la iathuh ba utei u jumai u la poi kumba 6.3 Magnitude.
Utei u jumai u la khie ha ka por kumba 12:04 mynsngi. Ka shnong kaba kham ïohsngew bha ia ka jingkhynñiuh utei u jumai ka dei ka El Calvario kaba don ha ka phang pdeng eh jong ka Colombia, kumba 25 mile lane 40 kilometer na Southeast jong ka Bogota.
Hadien kata pat, u la wan sa u jumai uba la don kumba 5.9 Magnitude ha katei hi ka noh phai sngi.
Ha katei ka sngi, ki ïingmala ha kylleng jong katei ka nongbah ki la khih eh bha bad ka jing-riew jong ki siren ka la pynkulmar jingmut ia ki paidbah nongshong shnong ha kaba ki la hap ban mih sha ki surok bad shabar jong ki iing- ki sem jongki namar ka jingsheptieng ioh ki ïing mala ba ki shong kin khyllem bad um lut ha utei u jumai uba la pynkhynñiuh ia ka shnong- ka thaw baroh kawei.
Hynrei, napdeng ki jingjia ba la ioh lum ha kylleng sawdong jong katei ka nongbah ha katei ka sngi, ka khubor ba sngewsih ka long ka jingkhlad noh jong kawei ka briew kaba la kynthih ruma hapdeng ka jingtieng nalor ka mala ba 10 mala jong ka ïing mala ba ka sah.
Ki tnat iarap kiba leit ban mareh mar-mar sha katei ka jaka ruh ki la pyntikna ba katei ka briew ka la khlad noh tang hadien khyndiat por ba ka la kynthih nalor iing.
Kumjuh ruh ki paidbah nongshong shnong jong katei ka ri ha katei ka sngi ki la pyntip ba ia utei u jumai la lah ban ïohsngew ha kylleng ki bynta jong ka ri naduh ka nongbah Villavicencio, Bucaramanga, Tunja bad kumjuh ruh ha Ibague, kiba long ki bynta ba marjan bad ka phang pdeng jong katei ka ri.
