Shillong, Nailar 18
Ka Boundary Committee jong ka Khasi Hills Autonomous District Council ha ka sngi Thohdieng ka la lum ïa ki nongsynshar shnong ka thaiñ khappud ban ïakren halor ki jaka ba ïakajia pud bad ha kane ka jingïalang la rai ban kyntu ïa ki nongshong shnong ha thaiñ khappud kiba don hapdeng ka jingïakajia pud ba kin mih paidbah ban pynpaw hakhmat jong ka Regional Committee ka Sorkar Assam bad Sorkar Meghalaya haba ka wan ban jurip.
Ha kane ka jingïalang la wan ïashimbynta lang da ki MDC, ki Syiem, ki Sordar, ki nongïalam shnong bad ki nongshong shnong ka thaiñ khappud ka Meghalaya bad ka Assam.
Haba kren sha ki lad pathai khubor hadien ka jingïalang, u Chairman ka Boundary Committee ka KHADC, u Bah Pynshngaiñlang N Syiem u la ong ba ki paidbah kiba shong ha ki 5 tylli ki thaiñ khappud kiba don jingïakajia bad ka jylla Assam, ki dei ban mih paidbah haba wan jurip ka Regional Committee jong ka Meghalaya bad Assam ban pynpaw ïa ka sur ka jong ki ba ki kwah ban don beit bad ka Meghalaya.
Ki 5 tylli ki thaiñ kiba don hapdeng ka jingïakajia pud bad ka Assam, ki kynthup ïa ka thaiñ Desh Domreah kaba hap ha Hima Mylliem, ka Borduar kaba hap ha ka Hima Nongspung bad Hima Nongkhlaw, Nongwah Mawtamur kaba hap ha Hima Sohïong bad Hima Jirang, ka Langpih kaba hap ha ka Hima Nongmynsaw, ka Block II kaba hapoh ka Raid Nongtung jong ka Hima Khyrim.
U Bah Pynshngaiñlang N Syiem uba dei ruh u Dy CEM ka KHADC u la ong ba ki shnong, ki Raid bad ki Hima ki la wan ban ai lang ïa ki kot jaka sha ka Council hadien ba ki la dep ban aiti sha ka Regional Committee jong ka Sorkar Jylla khnang ba ka Council kan ïoh ban buddien bad ban ïakren ha ka jingïalang jong ka Regional Committee jong ka Sorkar Jylla. Ki kot ki sla kiba la ïohpdiang ki dei naduh ki snem 1900 tam ba kiba bun ki jaka ki hap hapoh ka jylla Meghalaya.
“Kane kan ïarap shibun ban pynshisha ïa ka jingdon u pud u sam bad ïa ka khana pateng lyngba ki kot ki sla kiba shisha,” la ong u Dy CEM.
Halor ka thaiñ Langpih bad ka jingkwah ban don ha Meghalaya, u Bah Syiem u la ong, ba ïa kane la pynkhamti ha ki nongmihkhmat ka Hima Nongmynsaw ba kin pyrshang katba lah ban pynsngewthuh ïa ki paidbah ban neh beit hapoh ka jylla Meghalaya.
U la bynrap ba kumba ka long mynta, ki la duna bha ki shnong kiba kwah ban hap sha Assam.
Ka KHADC ka donbynta lang ha ka Regional Committee kaba la thaw da ka Sorkar Jylla ban pynbeit pud ha ki 6 tylli ki jaka kiba dang sahteng ban pynbeit pud.
