Ha ka 1 tarik Jylliew, 2023, u nongïalam ka Voice of the People Party (VPP), Bah Ardent Miller Basaïawmoit, u la pynsangeh ïa ka jingshah thngan kaba la neh kumba 10 sngi hadien ba ka sorkar jong u Conrad K Sangma ka la mynjur ban thaw ïa ka ‘Expert Committee’ lane ka kynhun ki ’riew shemphang ban peit bniah ïa ka jingdawa ban pynthymmai noh ïa ka ‘Reservation Policy’ lane kata ka jingai bhah kam bhah jam ïa ki Khasi-Jaiñtia, Garo bad kiwei. Kum ka jingbuddien ïa ka byrta ba la pynmih ban thaw ïa ka ‘Expert Committee’, ka kynhun VPP ka la leit ïakynduh ïa u Conrad ha ka 13 tarik Naitung, 2023, bad ha kato ka jingïakynduh, u Myntri Rangbah u la ong ba ka sorkar ka donkam ban thung sa tang ïa u/ka Shongknor jong kane ka kynhun ki ’riew shemphang.
Mynta ka la ïaid la shi bnai tam naduh katei ka jingïakynduh, hynrei ngim pat ïohi ne ïohsngew eiei na ka sorkar u Conrad. Ngi sngewthuh ba ka jingkhohreh ka sorkar ban pynbna ba kan thaw ïa katei ka ‘Expert Committee’ ha ka 1 tarik Jylliew, 2023 ka long tang ka sienjam ban pynthanda ïa ka jingïakhih bad jingdawa jong ka VPP ban pynkylla beit noh ïa ka bhah thung kam thung jam. Lada dei ba kam long kumta, kumno kan shimpor haduh ar bnai tam tang ban jied ïa u/ka Shongknor jong kata ka kynhun? Hato ka Meghalaya ka duna mo ïa kita ki ’riew shemphang kiba lah ban shimti ïa ka kam? Lehse ïoh ba ym don ba treh ban shim ïa ka jingkitkhlieh ban kit ïa ka lyngkor? Lada ka sorkar kam don jingnang ban wad ïa u/ka Shongknor, ka dei ban ïathuh beit ïa ka jingshisha khnang ba ma ngi na ka liang ki nongshong shnong ngin lah ban tyrwa ïa ki kyrteng.
Ngi sngewthuh ruh ba ka sorkar ka don hapdeng ka jingeh – ban pynkylla lane ban pynneh kumjuh ïa ka bhah thung kam thung jam – na ka daw ba ki don artylli ki sur lane palat kiba la pynsngew ïa ki nongrim ki jong ki halor kane ka mat ka bakongsan. Hynrei kata kam mut ba ka sorkar kan shu sngap bad mutdur ba kata ka jingdawa ne jingbym dawa kan shu jah hi noh na kane ka sla pyrthei. Ka dei ban don ka ‘Expert Committee’ khnang ba baroh kin dup lah ban leit rah ïa ki jingai jingmut bad kita ki ’riew shemphang kin peit bniah bin-pa-bin ïa baroh ki jingthoh jingtar, jinglong jingman bad kiwei ki jingdonkam hashwa ba kin tyrwa ïa ki rai sha ka sorkar jylla ba kan pyntreikam lane kan ym pyntreikam. Dei ban ailad ba kan don ka jingïakren jingïathir bad ym ban shu sngap man-man.
Lehse ka sorkar ka ap sa ïa ka kylla kaba ar jong ka jingïakhih da ka VPP hashwa ba kan lah ban shim rai biang. Namar ngi ïohi ba kane ka sorkar bad kiwei pat, kim ju khih ju ksar lada khlem pat don ka jingïakhih. Ka nuksa ka long ki nonghikai kiba la mih bad thiah miet ha surok ban ïoh ïa ka tulop ka jong ki. Lada dei ba ki khlem ïakhih, ki nonghikai kin dang hap ban shu ap sah ïa kata ka tulop kaba dei ka hok ka bynta ka jong ki. Haba ka long ha kane ka rukom, ngin ym sngewphylla lada u Bah Ardent bad ka VPP ki pynbna sa ïa ka kylla kaba ar jong ka jingïakhih.
Ha kine ki sngi, ngi la ïohi ïa ki khubor halor ka jingpoi jong u sohtrun na East Garo Hills shaduh sha Abu Dhabi. Ïa une u sohtrun la buh ha kata ka ïew bah ba la tip kum ka Al-Wahda Mall. Ngi sngewsarong kum ka jylla ba kiwei pat ki jaka ha ka pyrthei ki la sdang thied ïa u sohtrun uba la thung bad mih na kane ka khyndew ka shyiap. Ngi kyrmen ba kiwei ruh ki Ri kin thied ïa ki soh ki pai kiba mih ha kane ka jylla jong ngi khnang ba ki nongrep kin ïoh jingmyntoi. Hynrei ka jingkylli ka long ba lada u sohtrun na East Garo Hills u la lah ban poi shaduh sha Abu Dhabi, shaei pat kata ka ‘Expert Committee’ wat hadien ar bnai tam? Ka la dei ka por ïa ka sorkar ba kan ai jubab namar ka jingsngap jar ka pynsuba sniew pynban.
