Jowai, Nailar 18
Ka Madan Thadmuthlong ka la buh jaka ïalade sha ka jingïakhun semi final jong ka lympung ïalehkai Third Division Football Tourn-ament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka Madan Thadmuthlong ka la lah ban pynliem noh ïa ka Mookyrdup da 4-0 kol ha ka jingïakhun quarter final kaba nyngkong ha ka sngi Thohdieng ha Kiang Nangbah Stadium Ladthadlaboh kaba ha Jowai bad u Precious Tang u la khur ïa ka hat-trick.
Haba phai sha ka jingïalehkai, ka Madan Thadmuthlong ka la ïoh ban pynshat bol bad ïalehkai bha naduh kaba sdang jong ka jingïalehkai. Ka jinglah jong ki rangïalehkai ban ïapashat bol, ka la pynklumar ïa ki rangïalehkai dien jong ka Mookyrdup kiba ym shym la lah ban khanglad ïa ka jingïoh thep kol ka Madan Thadmuthlong.
Ka jingïakhun ha kane ka quarter final kaba nyngkong, ka la long kaba ïakhaid bha ha kaba baroh ar tylli ki kyhun ki la pyrshang ban ïoh thep kol. Ka Madan Thadmuthlong ka la ïoh ban pynkhih jar lyngba u Precious Tang ha ka minit kaba 42, hynrei shwa ban kut ka jingïalehkai jong ka kylla step kane ka kynhun ka la pynbud biang sa shi kol lyngba u Manhok Suchiang ha ka minit kaba 45 na ka bynta ban tam 2-0 kol.
Hadien katto katne por ba la bteng biang ïa ka jingïakhun jong ka kylla miet, u Precious Tang u la thep biang sa ar kol ha ka minit kaba 59 & 74 na ka bynta ban khur syndon ïa ka hat-trick bad ban pynlong shyndon ïa ka Madan Thadmuthlong ban khur ïa ka jingjop.
Kiwei pat ki jingïakhun quarter final kiba dangsah kin long hapdeng ka Mukhla Umlangchor pyrshah ïa ka Newhill ha ka por 11 baje mynstep, ka Pateinki Sabah ïa ka Moodop Royal ha ka por 1 baje nohphai sngi bad ka Madankynsaw kan ïakhun pyrshah ïa ka Da-i-hi-Mynsngat ha ka por 3 baje janmiet.
