Shillong, Nailar 18
Ka Oste Phi Oiñ ka la long ka kynhun kaba nyng-kong ban jam sha ka semi final ha ka lympung ïalehkai Football Knockout Tournament 2023 ba la pynïaid da ka Khasi Social and Cultural Sports Club.
Kane ka la wan urlong hadien ba ka la lah ban pynliem noh ïa ka Stend United da 3-0 kol ha ka sngi Thohdieng kaba la long ha madan Kurkalang kaba ha Bhoirymbong.
Kat kum ka kyrwoh la ong ba kane ka jingïakhun quarter final kaba nyng-kong ka la long kaba itynnad bad kaba ïakhaid bha naduh kaba sdang. Dei hadien shiteng kynta ba ka Oste Phi Oiñ ka la ïoh ban pynkhih jar nyngkong eh lyngba u Risuk Malngiang ha ka minit kaba 35.
Ha shwa ban kut artad ka jingïalehkai jong ka kylla step, u Wallamsuk Nongkhlaw u la ïoh ban thep kol ha ka minit kaba 45 na ka bynta ban pynlong ïa ka Oste Phi Oiñ ban tam da 2-0 kol.
Hadien kattto katne por ba la bteng biang ïa ka jingïakhun jong ka kylla miet, ka Oste Phi Oiñ ka la ïoh ban thep biang ïa ka kol kaba lai lyngba u Lastborn Mawphniang ha ka minit kaba 75.
Watla ki rangïalehkai ka Stend United ki la pyrshah ban pynphai, hynrei haduh kaba kut ka jingïalehkai kam shym la lah ban pynurlong bad ka la duh ïa ka lad ban jam sha ka semi final.
Ïa ka nam Man of the Match la khur da u Wallambok bad ïa ka trophy la sam da u Coach barim ka Langsning FC u Bah Hering Shangpliang.
Kawei pat ka jingïakhun pre-quarter final kan long mynta ka sngi Saitjaiñ hapdeng ka Jaguar FC pyrshah ïa ka Lumdaitkhla FC.
