Shillong, Nailar 18
Ka Meghalaya State Olympic Association (MSOA) ha ryngkat ka jingïasnoh kti lang bad ka tnad ïalehkai ka Sorkar Jylla, kan pynlong biang ïa ka 2nd Sohra International Half Marathon ha ka 30 tarik mynta u bnai.
Ha kane ka sien ba ar ki bor pynïaid ki la pynkhreh ban pynlut haduh T. 12.70 lak, kynthup ruh ïa ki khusnam na ka bynta ki nongjop kynthei bad shynrang.
Wat la ha u snem ba la dep ki la la don kumba 700 ngut ki nongwan ïashim bynta, hynrei mynta ka kynti la khmih lynti ba kin wan khambun ki nongwan ïashim bynta napoh ri India bad nabar ri kumjuh.
Kane ka jingïakop kan kynthup ïa ka Elite kaba 21 km ha kaba kin don ruh kin nongïashim bynta nabar ri lem bad ki nongmareh jong ka ri, katba ha ka Meghalayan kaba 10 km kan dei na ka bynta ki nongmareh kiba napoh ka Jylla ryngkat ka Run for Fun na ka bynta kiba la kham rangbah bad ki khynnah.
Ki bor pynïaid ki la pynkhreh ruh ïa ki khusnam na ka bynta baroh ki nongïakop ha ka Elite, Meghalayan bad kiwei. Ka khusnam ïa ki nongjop ha ka Elite (21 Km) ka long T. 1 lak, T.70,000 bad T.50,000 ïa kiba wan ba nyngkong, ba-ar bad balai lem bad mar T. 10,000 ïa kiba wan ha ka kyrdan basaw haduh baphra. Katba ha ka Meghalayan Open (21 km Above 18yrs) ki nongjop kin ïoh T. 50, 000, T. 30,000 bad T. 20,000 ryngkat bad mar T. 5000 ïa kiba wan basaw haduh ba khyndai.
Ha ka Meghalaya Open (10K run below 45yrs) kan long T. 30, 000, T. 20,000 bad T. 10,000 ïa kiba wan ha ka kyrdan ba nyngkong, ba-ar bad balai ryngkat bad mar T. 5000 ïa kiba wan basaw haduh ba phra.
Ki nongjop ha ka kyrdan ki nongmareh kiba naduh 45-55 snem ka rta (10K run) kin ïoh T. 20,000, T. 10,000 bad T. 5,000 ïa kiba wan ba nyngkong, ba-ar bad balai, ryngkat bad mar T. 3000 ïa kiba wan basaw haduh baphra.
Ki nongjop ha ka Veteran Above 55yrs 10K Run, kin ïoh T. 20,000, T. 10,000 bad T. 5,000 ïa kiba wan ba nyngkong, ba-ar bad balai, ryngkat bad mar T. 3,000 ïa kiba wan basaw haduh baphra.
Ki bor pynïaid ki la pynbna ba ïa ka jingpynrung kyrteng na ka bynta ki nongshim bynta ka long lyngba ka ‘online’ da kaba kin leit ha ka website https://meghalayaolympicassociation.com/marathon-run.com.
