Washington, Nailar:
Katkum ki khubor la ong ba uwei u briew na United States, u la siat ia la ka paralok na kjat tang namar ba ka leit sha ka jaka leh sngewbha ne ‘Party’ khlem ma u. Katei ka khynnah ba shah siat, ka la don 17 snem ka rta bad kane ka la jia namar ka jingbitar jong utei u samla jongka halor ka jingleit sha katei ka jaka khlem ma u.
U Fahd Mahdi, u long u nongshong shnong ka Utah bad u la shah kem noh ha ka Sngi Ba-ar halor ka jingsiat ia katei ka khynnah samla ha katei ka jingjia. La ong ba u Mahdi u la siat ia katei ka samla jong u ha ka 6 tarik u Nailar, hadien ba u shem ba katei ka samla ka leh bym suitñiew ia ki jingsngew jong u bad ka la leh ia kiei- kiei khlem ka jingiatip lem bad ka jingiabeit bad u.
Katkum ka jingphla jong kitei ki 2 ngut, la ong ba u Mahdi u la dep maham lypa ba lada katei ka samla kan leit marwei sha katei ka jaka leh sngewbha, un wanrah jingkulmar beit khlem jing salia ïano- ïano ruh. Hynrei, la ong ba katei ka khynnah ruh, khlem da pynsngap ia ka jingmaham jong u, ka la leit marwei sha katei ka jaka kaba u la khang bad maham ia ka.
Tang hadien khyndiat kynta ba katei ka khynnah ka leit poi sha katei ka jaka leh kmen, utei u samla ruh u la leit poi lang hangta bad u la bitar bad ong ia ka ba um salia ban thap ne shoh ia ka wat hakhmat jong kiba don hangta baroh.
Katba, ha ka janmiet jong katei hi ka sngi, utei u samla u la siat syndon ia shiliang ka kjat jong katei ka khynnah katba ka dang shong ha ka jaka shong ba shadien jong ka kali ki paralok jongka.
Hadien katei ka jingjia, la pynkit noh mar-mar ia katei ka khynnah sha ka jaka sumar kaba kham hajan, ha kaba ki doktor ki iathuh ba ka shyieng kjat jongka, ka la pait bad ka la kdiah na katei ka jingshah siat.
Tang mar ia poi ki pulit sha katei ka jaka, katei ka khynnah ruh khlem da pynslem ka la phla ia ka kyrteng jong u nongsiat ia ka, uba long u samla jongka hi bad mar kumta hi, ki pulit ki la leit thwet bad la ioh ban kem noh ia u Mahdi napoh ka iingsah jong u hapoh South Jordan.
Haba iakren bad ki pulit, katei ka khynnah ka bym shym treh ban pynpaw kyrteng, ka la phla ba ka jing ia iaid paralok jongka bad utei u samla, ka long kaba sniewbok haduh katta, naba ka sngew ialade ba ka long tang kum ka tiar ban pyndonkam da utei u samla bad u ju byrngem- byrsit ia ka man ka por bad u ju pyni bor ruh ha baroh ki liang. Kumta, ka la iathuh ba kam kwah shuh ban dang don jingiadei bad u namar ka jingleh don bor jong u bad ka ju shah pynshitom ha u bad met bad mynsiem bad kam ioh shuh wat tang ba kan im laitluid kumba long kiwei pat ki samla.
Ia utei u samla, la set hapoh ka Salt Lake County Jail, khlem da buh ruh ia ka dor bah jamin.
