Dr. Boss L. Marthong
New – Nongstoiñ
Kumba ka la paw lyngba ki kot khubor u Chief Minister Mr. Conrad K. Sangma ryngkat bad ka kynhun Myntri jong u lem bad u Speaker ka Meghalaya Legislative Assembly ki la leit ïa kynduh ïa u Prime Minister ka ri India u Narendra Modi ha New Delhi dang shen Nailar, 2023 bad la ioh ban ïa kren markhmat bad u Prime Minister ha kaba ïa dei bad ka jingdawa ILP na ka bynta ka Meghalaya bad ban ioh pynrung noh ïa ka ktien Khasi bad ktien Garo haka Kyrnit ba phra jong ka Constituency jong ka ri India kumba la ïai dawa kham slem naduh mynta bad shibun kiwei kiwei pat ki mat jingdawa na ka bynta ka Meghalaya, ka jinglah jong u Conrad K. Sangma ban ialam syndon da ka kynhun Myntri jong u ban ioh ïa kren markhmat syndon bad u Prime Minister ka long ka kam kaba dei eh bad kaba donkam tam, ka pynpaw ïa ka jingshim khia jong u na ka bynta ka State Meghalaya bad ka long ka kam kaba ngi dei ban ai jingïaroh ïa u Chief Minister jong ngi.
Ngi iohi ruh ba u Conrad K. Sangma kum u Chief Minister u la shim khia bha ha kaba ïadei bad ka kam ïa pynbeit pud bad ka Sorkar Assam, u nangbha ban pynïadei jingmut bad u Chief Minister ka Assam, khnang ban ioh ïa pynbeit da ka jingsuk ïa ki jingïa kajia pud bad ka State Assam kaba la neh la slem bha naduh ba la ioh ïa ka State Meghalaya ha u snem 1972 da kaba phiah noh naka Assam. Ym pat don uwei ruh u Chief Minister ba mynshuwa ka Meghalaya u ban shim khia ïa ka kam ïa kajia pud bad ka Assam u ban leit ïa kynduh khah khah bad u Chief Minister ka Assam kumba la leh u Conrad K. Sangma. U Conrad K. Sangma u ju ïakren phone bun bunsien bad u Chief Minister ka Assam nalor ba u ju ïakynduh ruh markhmat bunsien na ka bynta ka jingïa pynbeit pud bad ka Assam.
Lada long kumno kumno ruh u Chief Minister jong ngi u la leh bad pynpaw shynna ba u la shim khia shibun na ka bynta ka State Meghalaya. Ym lah ban tip lypa la ngin ioh kheit ne em ïa u soh ba thiang hapdeng kane ka jingtrei shitom bad shim khia ïaka kam da u Chief Minister ba don burom jongngi, u Conrad K. Sangma. Nga sngewdei ban ong ba u dei u Chiefs Minister uba tbit bha na ka bynta ka Meghalaya. Ngi la iohi ha kato ka por ba ki Pastor ba ieit jong ngi ki la shah kynnoh bym dei bad shah ker kut ha u paidbah bhur ha Bihar ha kine ki bnai ba la dep da ka jingshim khia kyrkieh kloi kloi da u Chief Minister la ioh jingiarap noh kloi na ki pulit ka Bihar, ki Pastor jong ka Balang Presbyterian ki la lait na ka jingmynsaw bad la ioh ban wanphai suk sha Meghalaya. U Conrad K. Sangma u nang bha ban kren ktien Hindu kumba nang ki actor India,. U don ïa ka lad ba kham bha shibun ban ïa kiwei kiwei ki Minister Meghalaya namar u la long teng u MP ka Meghalaya ula ïa ithuh bad bun ngut ki MP bad ki Union Minister ka ri India, kumta ha ka jingiadei kam bad ki Minister India u la kham suk shibun ha kiba bun ki bynta, na ka bynta ka roi ka par ha Meghalaya. Ngi sngewtynnad eh ïaka jingkren u Conrad Ka. Sangma uba la ong ba ngi donkam ïaka bor kaba khlain ha North East, ngi ïatrei lang bad ka NDA tangba ngim leh pyrshah ïaka mon u paitbah. To u Chief Minister jongngi un nang kiew nang roi hala ka kam kum u Chief Minister jong ngi ba un nangioh ïa ka roi ka par ba kham bha na ka bynta ki paidbah ka Meghalaya, ai ba un nangioh ïaka jingkoit jingkhiah ba bha ba un ioh shakri khambha ïaki nong Meghalaya.
