Geneva, Nailar:
Ka World Health Organization (WHO) ha ka Sngi Saitjaiñ ka la pynbna ba ka dang pule bniah ia u khñiang jingpang Covid-19 ‘Variant BA.2.86’ hadien ba la iohi ia ka jingkhlaiñ jong utei u jait khñiang ban pynkylla dur ialade.
Ka WHO ha katei ka sngi ka la pyntip ba ki don 3 tylli ki jait khñiang jingpang ‘Variants’ kiba ka tnat ka dang bud dien bad 7 tylli pat kiba ka dang pule bniah ha kane ka por.
Katei ka tnat ka koit ka khiah jong ka pyrthei, ka la pynshai ruh ba u khñiang jingpang Covid-19 haduh kine ki sngi ba mynta ruh u dang iai kylla dur bad u dang ialeh ban pyn pur bad pynsaphriang katba lah bad kumta ki ri ka pyrthei kim dei ban leh sting ne ban shim sting haba ki iohi bad shem ba ka jingdon kiba ioh kem pang hapoh ka ri ka kiew stet.
Shuh shuh ruh ka WHO ka la iathuh ba haduh mynta, ka dang ialeh katba lah ban tih bniah bad ban tih jylliew ia ka jinglong- jingman jong une u khñiang jingpang bad ka bor jong u ban saphriang bad kumjuh ruh ka jinglah jong u ban kylla dur na kawei sha kawei pat ka jinglong.
Dang shen ha kine ki khyndiat taiew ba la leit, la ong ba utei u khñiang jingpang EG.5 ba thymmai duh uba la buh kyrteng u ‘Eris’, u la wanrah jingsyier ia kiba dun ki tnat ka koit- ka khiah namar ka jingstet jong u ban pur bad ban saphriang wat ha United States bad kumjuh ruh ha Britain. Hynrei, hadien kumba katto katne por pat la ioh jingtip ba utei u khñiang jingpang um da pher hi na kiwei pat ki khñiang jingpang Covid kiba la ju ioh mad ha ki por ba la leit bad wat ki dak jingshitom jong u ruh ki long hi kumjuh. Hynrei kaba kham sngewkhia ka long namar ka jingstet jong u ban pur bad saphriang.
Utei u khñiang jingpang EG.5 u long kumba 17% na ka jingdon kiba ioh kem pang Covid thymmai ha kylleng ka pyrthei ha kine ki sngi.
