Ha kine ki khyndiat sngi ba la dep, ka Voice of the People Party (VPP) ka la thoh sha u Myntri Rangbah, Conrad K Sangma, ban pynsangeh noh ïa ka jingïasoi kontrak bad ka M/S Rocky Dhar ha kaba ïadei bad ka rai ban aiti sha ka M/S Rocky Dhar ïa ka khrum jong ka ‘Commercial Complex’ kaba don ha Meghalaya House, Russell Street ha sor Kolkata. Ka seng ka la sngewkyndit ban tip halor ka rai jong ka tnat General Administration Department (A) jong ka sorkar jylla ban aiti noh ïa ka khrum lane ‘Ground Floor’ jong katei ka ‘Commercial Complex’ sha ka M/S Rocky Dhar kaba don ha Nongmynsong, Umkdait. Kumba ka long mynta, ïa katei ka khrum la pyndonkam da lai tylli ki shnat jong ka sorkar ba kynthup ïa ka Tourist Information Centre hapoh ka jingkhmih jong ka Directorate of Tourism, Directorate of Horticulture bad ka Government State Emporium kaba hap hapoh ka jingkhmih jong ka Meghalaya Handloom and Handicrafts Development Corporation Limited. Ka VPP ka la ong ruh ba la buh ïa kine ki shnat jong ka sorkar kum shi bynta ban pynïaid ïew bad pynpaw nam ïa ki tiar ki tar ba la pynmih na Meghalaya.
Namarkata ka VPP ka la ong ba kumno ka sorkar, kaba dei ban shakri ïa ki paidbah lyngba ki shnat jong ka, ka la shim ïa ka rai ban pynbiang ïa ka jingdonkam jong uwei u briew khlem da pyrkhat shuh ïa ka jingdonkam jong kiba bun ba lang. Ha ka jingshisha, ka VPP ka la ong ba ka sorkar ka don ïa ka jingkitkhlieh ban kyntiew ïa ka ïoh ka kot jong ki paidbah bad kumjuh ruh ïa ka kolshor jong ka jylla. Ka VPP ka la ong ba ha ka jingshisha, la khot ‘Tender’ na ka bynta kawei ka jaka kaba lait ha katei ka Commercial Complex, hynrei ym na ka bynta ka khrum lane ‘Ground Floor’. Hynrei, haba la ai pat ïa ka ‘Tender’, la ai na ka bynta ka khrum jong ka ‘Commercial Complex’ bad kane ka pyni ïa ka jingpynkheiñ ïa ki aiñ bad ki kyndon bad ka jingpulom jong ki bor ba dei khmih ban leh ïa ka kam kumba ka dei.
Ka VPP ka la pyrshah jur ïa katei ka rai ban aiti ïa ka khrum jong ka Commercial Complex sha ka M/S Rocky Dhar da kaba ktah ïa ki shnat treikam jong ka sorkar bad kumjuh ruh ïa ki nongthaiñ nongshna ïa ki tiar ki tar na kane ka jylla. Namarkata, ka VPP ka la dawa ïa u Conrad ba un tuklar halor kane bad ban pynsangeh noh ïa ka jingaiti ïa ka kontrak sha ka M/S Rocky Dhar na ka bynta ka jingbit jingbiang bad jingmyntoi jong ka jylla bad ki paidbah.
Ka ju don ka ktien kaba ong – yn ym don tdem khlem ka ding. Ha kajuh ka rukom, ngim tharai ba ka VPP kan thoh ïa katei ka shithi ban pyrshah ïa ka M/S Rocky Dhar ban ïoh shong ha ka khrum jong ka ‘Commercial Complex’ lada kam don ki jingshisha bad ka. Baroh ngi tip kaei kata ka M/S Rocky Dhar bad ka don jingïadei bad no. Ngi kwah ba ka sorkar kan pynshai ba kumno kan phah pynkynriah ïa ki shnat jong ka tang ban ïoh ai jaka ïa kane ka kynhun M/S Rocky Dhar. Ka jingkynthoh jong ka VPP ka long kaba shisha ba kumno ka sorkar, kaba dei ban shakri ïa ki paidbah lyngba ki shnat jong ka, ka la shim ïa ka rai ban pynbiang ïa ka jingdonkam jong uwei u briew. Kham khraw ki shnat treikam ka sorkar lane uwei u nongshong shnong? Kham donkam ban peit ïa ka bha ka miat jong baroh salonsar lane ban trei tang na ka bynta ka jingïoh myntoi shimet jongno-re-jongno?
Namarkata, ngi kyntu ïa u Myntri Rangbah uba ju smat ban kren sha ki paidbah halor ki mat ki jura bapher bapher ba un mih shakhmat ban pynshai halor katei ka bynta. Ngi kyrmen ba kum u nongïalam ka jylla un ym ailad ïa ki ’riewshimet ba kin kham khraw ban ïa ki paidbah nongshong shnong namar katei ka jaka kam dei ka nongkynti jongno-re-jongno, hynrei ka dei jong ka jylla. Ngin da long shisha kiba la jem rngiew lada ka sorkar ka trei na ka bynta ka jingmyntoi jong u ’riewshimet. Ka VPP ka dei ban ïaid shakhmat ban ïai dawa na ka sorkar ba kan pynshai halor katei ka kam. Ym lah ban shu ïa sngap jar haba ngi shem ba ka don ka jingleh tam jong ka sorkar. Lada ngi sngap, ka mut ngi kyrshan wat lada ka sorkar ka leh bakla bad ka trei tang na ka bynta ka jingmyntoi ki briew shimet.
