Shillong, Nailar 20
Ka Spain ka la ïoh rah ïa ka nam lahduh kaba nyngkong eh jong ka lympung World Cup ki kynthei hadien ba pynliem noh ïa ki ‘thei jong ka England ha ka final kaba la long ha Sydney ha ka Sngi U Blei.
Ka jingïoh rah jong ka Spain ïa ka nam lahduh jong ka Women’s World Cup ka la long hadien ba ka la lah ban pynliem noh ïa ki ‘thei ka England da 1-0 kol. ïa kane ka kol kaba donkam tam la ïoh ban khyrwit da ka Olga Carmona kaba dei ruh ka kapten jong ka Spain ha ka minit kaba 29.
Ka Olga Carmona ka la lah ban pynpaw ïa ka jingtbit kum ka nongïalehkai hadien ba ka la ïoh ban khyrwit bun kol na ka bynta ka Spain ha kane ka World Cup, bad ba kan long ruh ka ‘thei ïalehkai kaba hynñiew ha ka history jong kane ka lympung ba kan thep kol ha ka semi-final bad final.
Ki ‘thei ïalehkai ka England kiba la phai khmat ban long ka kynhun ba nyngkong ban jop World Cup kata naduh ba ki ‘rang kane ka ri ki la ïoh rah ha u snem 1966, ka la shah ktah bad kut noh ha kaba kin hap ban dang ïap ha kawei pat ka lympung ka ban wan.
Kane ka jingshah rem jong ka England, kan dei ruh kaba nyngkong ha kane ka lympung bad ruh na ka bynta ka coach ka Sarina Wiegman, ïa kaba la thung ha u snem 2021 kum ka manager jong ka kynhun.
