Camp David, Nailar:
U President ka United States (US) ha ka Sngi Thohdieng, u la ong ba wat la ki jingiakynad bad jingiathut bad ka China ki ju jia man ka por hynrei u don jingkyrmen ban iakynduh markhmat bad u nongialam ka China- u Xi Jinping ha kine ki khyndiat bnai ki ban wan hapoh jong une hi u snem.
U Biden u la iakynduh nyngkong bad u Xi dei ha u Naiwieng jong u snem 2022 hapoh Bali, ha kaba kitei ki nongialam ki la ia kular ban iatrei lang bad ban ia ai jingkyrshan mar kylliang na ka bynta ban pynbit- pynbiang ia ka pyrthei.
Shuh shuh ruh la ong ba u Biden u la khot sngewbha ruh ia u Xi ha u Naiwieng ban iakynduh ha San Francisco, ha kaba ka United States ka pynlong ia ka jingialang ‘Summit’ jong ka Asia- Pacific Economic Co-operation, ba la kynthup lang ia ka China.
Kumta, la khmih lynti ruh ba kitei ki 2 ngut ki nongialam kin iakynduh biang ha u bnai u ban wan hapoh New Delhi, ha ka jingialang ‘Summit’ jong ka kynhun Group 20 ‘G-20’.
